VOV4.Sêdang - Ngế ki vê rơxế tâ COVID-19 mê cho N.M.T. (33  hơnăm ối a thôn 5, cheăm xã Đinh Trang Thượng, tơring Di Linh), cho ngế ki tâ pơreăng má 41.056  ƀă cho ngế ki tâ COVID-19 má 15  dêi kong pơlê Lâm Đồng. Tiô séa ngăn dêi khu ngăn pơkeăng, ngoh T. ối a kŏng ti Thiên Anh, pơlê krâm 12, Pơlê kong kân Hồ Chí Minh.

Dâng 2h hâi lơ 12/7, ngoh T. to rơxế hon đa vêh ngi tơring Di Linh. Drêng troh a tíu gâk ngăn a văng Chuối (tơring Dạ Huoai, Lâm Đồng), ngoh T. ai tối tơbleăng tơná la ôh tá vâ tối tơdrăng, hêak tối dêi tơná lo ing pơlê kân Madaguoi (Dạ Huoai) vêh, mê chiâng tơkâ luâ tíu gâk ngăn mê. Hâi lơ 15/7, ngoh T. to rơxế hon đa ing hngêi lăm troh a hngêi pơkeăng bêng B’Lao (pơlê kong krâm Bảo Lộc vâ test rĕng COVID-19, ăm hlo test rôh má péa yương tĭnh.

Lâm Đồng dế lăm tăng mâu ki achê, klâ krê ƀă khăm ngăn mơheăm, têa hế mâu ngế ki ối achê ngế ki tâ pơreăng

Kơ’nâi mê ngoh T. châ thái pơkeăng xo mơheăm têa hé khăm ngăn RT - PCR a Hngêi Đa Khoa II Lâm Đồng ƀă ăm ‘nâi yương tĭnh ƀă SARS-CoV-2. Tiô pôa Nguyễn Đức Thuận, Ngế xiâm pơkuâ ngăn pơkeăng pơlât kong pơlê Lâm Đồng tối, kơvâ ngăn pơkeăng thế rĕng tơrŭm ƀă mâu tíu pêi cheăng khu râ pơkuâ cheăng lăm tí tăng rĕng 5 ngế F1 ƀă 9 ngế F2 ki ối achê ƀă ngế ki tâ pơreăng. Tâi tâng mâu ngế ki mê khăm ngăn apoăng xuân âm hlo âm tĭnh.

Nôkố tơdroăng lăm tăng, klâ krê ƀă séa ngăn mơdât pơreăng a mâu ngế ki tơdjâk troh dêi ngế ki tâ pơreăng dế châ mâu khu râ pơkuâ cheăng kong pơlê Lâm Đồng thâ tơbleăng pêi pro.

Gương tơplôu ƀă tơbleăng