VOV4.Sêdang - Kơxo  lơ 1/7, Hô̆i đong hnê ngăn kong pơlê Lâm Đồng hneăng má 10, hơnăm 2021 – 2026 hiăng tơkŭm po rôh hôp má môi vâ pôk inâi mâu kăn ối tung tơdroăng pơkuâ ƀă tơbleăng mâu hlá mơ-éa ki kal. A rôh hôp, Vi ƀan tâ phĭu kong pơlê Lâm Đồng hiăng tối tơbleăng klêi kơ’nâi pôk, mơnhên hiâm mơno ƀă diâp hlá mơ-éa mơnhên ăm 66 ngế kăn Hô̆i đong hnê ngăn kong pơlê hneăng má 10, hơnăm 2021 – 2026.

Rôh hôp má môi Hô̆i đong hnê ngăn kong pơlê Lâm Đồng hneăng má 10, hneăng hơnăm 2021 – 2026

Mâu kăn xuân hiăng tâ phĭu pôk inâi mâu kăn xiâm dêi Hô̆i đong hnê ngăn kong pơlê ƀă Vi ƀan hnê ngăn kong pơlê, pôk kăn pơkuâ, kăn phŏ pơkuâ khu ki pơkuâ mâu tơdroăng luât pơkâ, liăn ngân, Mơhno túa lĕm tro pơlê pơla ƀă Khu ngăn hdroâng kuăn ngo, Khu séa ngăn kuăn pơlê ƀă mâu ngế cheăng tung Vi ƀan hnê ngăn kong pơlê.

Pôa Trần Đức Quận, ngế cheăng tung tíu xiâm Đảng, kăn pơkuâ ngăn Đảng, kăn hnê ngăn Hô̆i đong kong pơlê hneăng má 9 pơtối châ pôk pro kăn hnê ngăn Hô̆i đong kong pơlê Lâm Đồng hneăng má 10; pôa Trần Văn Hiệp, kăn phŏ pơkuâ ngăn Đảng, kăn hnê ngăn Vi ƀan kong pơlê hneăng má 9, châ pôk pro kăn hnê ngăn Vi ƀan kong pơlê hneăng má 10, hơnăm 2021 – 2026.

Pôa Trần Đức Quận, Ngế cheăng tung tíu xiâm Đảng, kăn pơkuâ ngăn Đảng kong ơlê Lâm Đồng châ pôk pro kăn hnê ngăn Hô̆i đong kong pơlê hneăng má 10

Rôh hôp kố ối mơdoh chôu tơpui tơno, têk kŏng ƀă tơbleăng mâu tơdroăng pơkâ ‘na tơkŭm po mâu rôh hôp tiah hmâ hơnăm 2021 dêi Hô̆i đong kong pơlê hneăng má 10, tơdroăng pơkâ tơbleăng xing xoăng tơdroăng ki ‘no liăn cheăng tơdjuôm ki krâ kơvâ khế hơnăm, hneăng hơnăm 2021 – 2026.

Nga tơplôu ƀă tơbleăng