VOV4.Sêdang - Kơxo lơ 12/7, a Hà Nội, pôa Nguyễn Xuân Phúc, Kăn xiâm hnê ngăn tơnêi têa, Kăn xiâm hnê ngăn Hô̆i đong cheăng lêng – gak kring, pơkuâ mâu khu lêng kuăn pơlê veăng leh tơbâ 75 hơnăm Hâi mơjiâng khu lêng gak kring kuăn pơlê lơ 12/7. Xông tơpui a leh tơbâ, pôa Nguyễn Xuân Phúc pơkâ thế khu lêng kuăn pơlê mơhé drêng lâi xuân thế đi đo rak pơkâ tơniăn pơkuâ tŭm tơdroăng dêi Đảng, tơdroăng pơkuâ hnê mơhno dêi Kăn xiâm hnê ngăn tơnêi têa, tơdroăng môi tuăn pơkuâ dêi Chin phuh.

Leh tơbâ 75 hơnăm hâi mơjiâng khu kŏng an kuăn pơlê

Tơdrêng amê pơtối pêi pro kơtăng, châ tơƀrê troăng pơkâ pêi, troăng hơlâ dêi Đảng, troăng pơkâ pêi luât dêi tơnêi têa ‘na gak kring tơnêi têa; hlê plĕng pơkâ, hnoăng cheăng pơkâ cho rak tơniăn gak kring tơnêi têa tung rêm tơdroăng, ôh tá ăm tơngôu, kơdrâ. Pôa Nguyễn Xuân Phúc pơkâ thế khu lêng gak kring kuăn pơlê pêi pro châ tơƀrê mâu troăng tơmiât pêi, troăng pêi: Gak kring hbrâ xêh, thế rĕng hbrâ xêh, hbrâ mơdât ing hơngế mâu tơdroăng ki tơ’lêi, tơdroăng ki pro ôh tá tơniăn; thế đi đo hbrâ xêh, rak krá tơniăn tung dế cho ki xiâm, tung mê, gâk kring tơnêi têa thế chiâng tơdroăng ki kal vâ mơjiâng ƀă mơnhông mơdêk tơnêi têa.

A Sa Ly tơplôu ƀă tơbleăng