VOV4.Sêdang - Pôa Nguyễn Trường Sơn, Ngế xiâm phŏ ngăn pơkeăng pơlât nếo ăm phêp pơlê kong kân Hồ Chí Minh mơnúa ăm klâ krê F0 a hngêi pakĭng klâ krê F1. Mê cho, klâ krê F1, ƀă mâu ngế ối a kơpong tơ’lêi tâ tú ki ôh tá ai tơdroăng pơkâ dêi Khu xiâm ngăn pơlê pơlât vâ klâ krê a hngêi (ai ngế F0 a hngêi ối a kơpong xiâm tơ’lêi tâ pơreăng môi tiah a hngêi ki mung ối, kơpong hngêi kuăn pơlê ki kơtiê, kơpong kí túc xá...) mê ăm lăm klâ tơchoâm, khăm ngăn mơheăm, têa kơhêa tiô túa RT- PCR hâi má 7 teăng a hâi má 14  môi tiah hdrối nah, tâng âm tĭnh kô pơ’lêh ăm lăm klâ krê a tíu ối.

‘Na tơdroăng klâ krê, pơlât ngế F0: ƀă mâu ngế ôh tá hlo tâ ki klâi tung châ ki dế pơlât a hngêi pơkeăng, tâng khăm ngăn RT- PCR hâi má 10 hlo âm tĭnh lơ ối yương tĭnh la hlo virus iâ, ôh tá kâi tâ tú (lơ lối iâ) mê kô ăm vêh lăm klâ krê a hngêi tâng tơniăn ôh tá ai tơdroăng klâi tung hbrâ mơdât pơreăng tâ tú. 

Tơbleăng tíu klâ krê F0 a hngêi ƀă mâu ngế ki ôh tá hlo ai ki klâi. Khu xiâm ngăn pơkeăng pơlât Pơlê kong kân Hồ Chí Minh tối nhên, khu ngăn pơkeăng cheăm tơring thế tơkŭm khăm ngăn, ngăn ivá rêm hâi,  ƀă mâu ngế F0 ki klâ krê a hngêi; tơkŭm pêi tơdroăng tí tăng ‘nâi mâu ngế ki nếo ai tơdroăng tâ tơviah tung châ, thế rĕng djâ khăm pơlât.

Gương tơplôu ƀă tơbleăng