VOV4.Sêdang - Hâi lơ 29/6, a Hà Nội, Vi ƀan xiâm Măt trâ̆n Tơnêi têa Việt Nam tơkŭm po Hôp ‘no tơdrêng ing um tơvi tơbleăng, hnê hriâm ‘na péa tơdroăng ki kal cho séa ngăn tung hơnăm 2021: “Séa ngăn tơdah kuăn pơlê ƀă pơkâ tơleăng tơdroăng ki pơsăm tối, pơsăm tơkêng ƀă kăn hnê ngăn Vi ƀan hnê ngăn rêm râ” ƀă Séa ngăn kăn ƀô̆, đảng viên ƀă tơdroăng pêi cheăng dêi kăn ƀô̆”.

Tung rôh pơkâ tơleăng pơsăm tối, pơsăm tơkêng, khu pơkuâ Tíu xiâm măt trâ̆n tơnêi têa rêm râ kô tơkŭm tung tơdroăng ki séa ngăn, tơdah kuăn pơlê ƀă pơkâ tơleăng pơsăm tối, pơsăm tơkêng, pơsăm tối ƀă kăn hnê ngăn Vi ƀan hnê ngăn rêm râ a kong pơlê tung lâp tơnêi têa.

Ƀă tơdroăng “Séa ngăn kăn ƀô̆, đảng viên ƀă tơdroăng cheăng dêi kăn ƀô̆”, Măt trâ̆n Tơnêi têa rêm râ kô séa ngăn tơdroăng ki pêi pro mâu tơdroăng pơkâ ‘na hnoăng cheăng kăn ƀô̆; séa ngăn tơdroăng pêi pro mâu tơdroăng pơkâ ‘na chêh tối, tơbleăng mâu kế tơmeăm ƀă mâu kăn ƀô̆, mơngế pơkuâ, mơngế cheăng dêi rêm râ Đảng, khu tơrŭm Đảng ƀă khu kăn pơkuâ, kơ koan tơnêi têa rêm râ; séa ngăn kăn ƀô̆, đảng viên a tíu ối ƀă hên ki ê.

Katarina Nga tơplôu ƀă tơbleăng