VOV4.Sêdang - Tiô ăm ‘nâi mâu tơdroăng ing Khu xiâm ngăn hnê hriâm ƀă hnê mơjiâng tuăn ngôa tơkê kong pơlê Kon Tum, hneăng tơ’noăng mơgêi hriâm râ má pái phôh thong rôh má 1 hơnăm kố kơxô̆ hok tro plah tơ’noăng châ 98,16% ƀă ai môi ngế hok tro châ ối má môi tung lâp tơnêi têa tơ’noăng khô̆i D. Rôh má 1 kố nah, kong pơlê Kon Tum ai 4.483 ngế hok tro tơ’noăng ƀă kơxô̆ mơngế plah ai 4.405 ngế. Kong pơlê Kon Tum ai ngế hok tro ki châ diêm hên má môi tung lâp tơnêi têa khô̆i D cho Bùi Thị Ngọc Quỳnh, lâm 12 chuyên Văn, Hngêi trung râ má pái phôh thong Chuyên Nguyễn Tất Thành ƀă kơxô̆ điêm tâi tâng ai 29,15 điêm.

Môi tíu tơ’noăng mơgêi hriâm râ má pái phôh thong rôh má 1 a kong pơlê Kon Tum

Dak Nông ai kơxô̆ mâu ngế plah tơ’noăng mơgêi hriâm râ má pái phôh thong hơnăm 2021 châ 97,1%, ƀă 6.702 ngế chêh inâi tơ’noăng. Tung mê, 10 ngế plah tơ’noăng châ 100%. Tiô riân ngăn, ai 80 ƀai tơ’noăng điêm hên má môi a mâu môn ing 9,25 tơngi klêng. Tung pơla mê, ai 57 ƀai tơ’noăng châ 10 điêm, mê cho:  Giáo dục công dân 50 ƀai, nâl Ănglê 4 ƀai ƀă Sinh học 3 ƀai. A Dak Lak, kơxô̆ hok troh plah tơ’noăng mơgêi hriâm râ má pái rôh má 1 xuân châ 97,01%, tâk 0,6% tâng vâ pơchông ƀă hơnăm 2020. Ai 10 to hngêi trung râ má pái ƀă 3 trung tâm (tung tâi tâng 58 to hngêi trung râ má pái phôh thong ƀă 15 to hngêi trung hnê ‘na tơdroăng cheăng pêi - Yăo yuk thương xuyên) ai kơxô̆ hok tro plah tơ’noăng châ tâi 100%.

Tiô Khu ngăn hnê hriâm ƀă hnê mơjiâng tuăn ngôa rơkê kong pơlê Dak Lak, lâp tung kong pơlê ai 292 ngế hok tro châ diêm sap 9,5 tơngi klêng ƀă mâu môn tơ’noăng krê.