VOV4.Sêdang - Hâi lơ 8/7, Khu xiâm pơkuâ ngăn lêng Mố đô̆i gak tơkăng kong Dak Nông tơkŭm po hneăng hôp tối mơgêi tơdroăng cheăng kring gak tơkăng kong 6 khế apoăng hơnăm 2021. Tiô Khu xiâm pơkuâ ngăn Mố đô̆i gak tơkăng kong Dak Nông, tơdrốu khế apoăng hơnăm kố, tơdroăng kring gak tíu tơkăng kong dêi kong pơlê vâ tối tơniăn; tơdroăng mơdât mâu ngế tê mơdró liu, mot lo hmâng vâ ƀă hbrâ mơdât pơreăng pêi châ tơ-ƀrê.

Hneăng hôp Khu xiâm pơkuâ mô đô̆i gâk kring tíu tơkăng kong Dak Nông

Tơdrêng ƀă tơdroăng rak tơniăn hnoăng pơkuâ kring gak tíu tơkăng kong, Mố đô̆i gak tơkăng kong Dak Nông ối kum kuăn pơlê kơpong tơkăng kong 1 rơpâu 250 hâi pêi cheăng, kum kuăn pơlê pro vâ chê 6km troăng kân tung thôn, ‘mâi rơnêu pro 6 toăng hngêi ăm mâu rơpŏng kơtiê. Khu xiâm pơkuâ ngăn Mố đô̆i gak tơkăng kong Dak Nông ăm ‘nâi, tung la ngiâ mố đô̆i gak tơkăng kong pơtối kring gak kơtăng hnê tối ăm kuăn pơlê kơpong tơkăng kong pôi tá xo ‘mot, kơtôa, pôi tá djâ mơngế ing ê mot hmâng vâ.

Pakĭng mê, mâu đông mố đôi kô pro kơtăng tâ nếo tơdroăng mơhnhôk thế kuăn pơlê tối ngế ki lâi lơ mot, kơtôa mơngế mot hmâng vâ a Việt Nam.

Gương tơplôu ƀă tơbleăng