VOV4.Sêdang - Ngế pro xiâm hnê ngăn Chin phuh nếo ai mơ-éa chêh tơbleăng tơdroăng kal pơtroh mâu Khu xiâm, kơvâ cheăng “ ‘Na tơdroăng thăm pêi pro mâu troăng thâ hbrâ mơdât tơpâ on chếo kong’’. Hlá mơ-éa tơbleăng ki kal pơkâ: Kăn hnê ngăn Vi ƀan mâu kong pơlê, pơlê kong kơdrâm ối tung tơnêi têa thâ hnê mơhno, pêi pro mâu troăng pêi ki thâ kơ’nâi: Pêi pro kơtăng hnoăng pơkuâ ‘na tơdroăng tơpâ on chếo kong, thăm séa ngăn ‘na hbrâ tơpâ on chếo kong ngăn kố cho hnoăng cheăng ki xiâm; Vêh séa ngăn khu cheăng, tơmeăm tơpâ on, kơxô̆ liăn vâ pêi pro tơtro troăng pêi “pŭn tơdrêng”; xing xoăng khu cheăng gâk plâ hâi plâ măng tung plâ rơnó tô; xing xoăng mâu tíu gâk ngăn, séa ngăn, kring ngăn a mâu kơpong ki tơ’lêi on chếo kong; teăm tơdrêng châ hlo tíu chếo, mơhnhôk khu râ veăng mơdât on chếo ƀă tơpâ on chếo tung iâ chôu, ôh tá ăm on chếo kâ kân; thế ai troăng tơpâ on ƀă hbrâ rơnáu pêi pro tơdroăng xĕn kuăn pơlê drêng kal; Thăm pơtâng tối, hnê hriâm mơdêk hlê plĕng, hnoăng cheăng tung tơdroăng tơpâ on chếo kong ƀă hía hé.

A Sa Ly tơplôu ƀă tơbleăng