VOV4.Sêdang - Klêi kơ’nâi 4 hâi pêi cheăng thâ, kơtăng, pôu râng hnoăng cheăng, kơxê lơ 8/7, Hneăng hôp roh má pái Khu xiâm pơkuâ tơnêi têa hneăng má 13 hiăng hôp mơgêi, pêi kêi đeăng tâi tâng tơdroăng xiâm pơkâ mơ’no, mơgêi rĕng tâ pơchông ƀă tối hdrối châ 1 hâi. Pôa Nguyễn Phú Trọng, Kăn xiâm pơkuâ hnê ngăn Đảng pơkuâ ƀă xông tơpui mơgêi hneăng hôp.

Ƀă tơdroăng ngăn tơdrăng a tơdroăng ki khât, séa ngăn mâu tơdroăng ôh tá tơdjâk pa kong, khoa hok, Hneăng hôp hiăng môi tuăn mơnhên tơdroăng châ tơƀrê pêi pro Pơkâ mơnhông mơdêk cheăng kâ – rêh ối pơlê pơla, liăn ngân tơnêi têa, mơ’no liăn cheăng iâ khế 5 hơnăm 2016 – 2020, ƀă tơdroăng pêi pro hnoăng cheăng mơnhông cheăng kâ – rêh ối pơlê pơla 6 khế apoăng hơnăm 2021.

Pôa Nguyễn Phú Trọng, Kăn xiâm pơkuâ hnê ngăn Đảng pơkuâ ƀă xông tơpui mơgêi hneăng hôp

Tơdrêng amê, tơpui hnê mơhno kêi đeăng tơdroăng tơkêa bro Pơkâ mơnhông cheăng kâ – rêh ối pơlê pơla, liăn ngân tơnêi têa, ƀă mơ’no iâ khế 5 hơnăm 2021 – 2025 vâ tơbleăng Kuô̆k hô̆i hneăng má XV séa ngăn, pơkâ a hneăng hôp má môi tiô tối hdrối kô châ tơkŭm po a mơ’nui khế 7 kố. Pôa Nguyễn Phú Trọng xuân tối ăm ‘nâi, a Hneăng hôp Tơnêi têa 3, Khu xiâm pơkuâ tơnêi têa hiăng rah xo tơ’nôm 2 ngế kăn cheăng tung Vi ƀan xiâm Tơnêi têa.

Tơdrêng amê, Tơnêi têa xuân pơkâ pơxâu phâk ƀă pôa Trần Văn Nam, Kăn cheăng tung Khu xiâm pơkuâ cheăng Đảng, Kăn pơkuâ hnê ngăn cheăng Đảng kong pơlê Bình Dương ƀă troăng hơlâ pơxâu, tah lôi tâi tâng kơlŏng cheăng tung Đảng; pêi pro pơxâu phâk Vũ Huy Hoàng, kăn cheăng tung Tíu xiâm Đảng, ƀă troăng pơxâu mơ’no lo ing Đảng.

A Sa Ly tơplôu ƀă tơbleăng