VOV4.Sêdang - Hneăng tơ’noăng mơgêi râ má pái phôh thong hơnăm 2021 roh 1 hiăng mơgêi a kơxê lơ 8/7 klêi kơ’nâi 2 hâi tơ’noăng. Kố cho hneăng tơ’noăng ki phá tơ-ê, xua tơkŭm po tung pơla pơreăng COVID 19 dế xông tâ tú ó, hên kong pơlê, pơlê kong kân môi tiah Pơlê kong kân Hồ Chí Minh, Bắc Giang, Bình Dương, Phú Yên, Hà Nội ƀă hía hé ai nếo ngế tro tâ.

Phiu ro xua ki hên hok tro pơrá chiâng pro ƀai

Xua mê, 63 kong pơlê hiăng hbrâ pêi pro mâu troăng mơdât ƀă mâu tơdroăng veăng kơtăng dêi mâu khu cheăng ki veăng, hiăng pro tíu tơ’lêi hlâu má môi ăm hok tro.  Tơdroăng tơkŭm po tơ’noăng xuân ai mâu tơdroăng ki ôh tá ‘nâi tối hdrối tơdjâk troh pơreăng xuân cho tơdroăng ki xo vế ăm mâu kong pơlê drêng tơkŭm po tơ’noăng mơgêi râ má pái roh kơ’nâi.

Mơgêi 2 hâi tơ’noăng, xuân u ối lối 23 rơpâu ngế hok tro a mâu kong pơlê, pơlê kong kơdrâm ôh tá châ vâ veăng tơ’noăng xua tơdjâk dêi pơreăng COVID 19 kô châ tơ’noăng roh má 2. Hên ngế kuăn pơlê pói tơngah, mâu kong pơlê kô xo vế túa ki rơkê tơtro vâ tơkŭm po roh tơ’noăng pơtối tơniăn tâ.

A Sa Ly tơplôu ƀă tơbleăng