VOV4.Sêdang - Kơxê lơ 28/6, Khu kăn Kuô̆k hô̆i kong pơlê Dak Lak hneăng má 14 tơkŭm po rôh hôp mơgêi tơdroăng cheăng pêi hneăng hơnăm 2016 – 2021. Khu kăn Kuô̆k hô̆i hneăng má 14 dêi kong pơlê Dak Lak ai 9 ngế kăn. Tung mê, ai 4 ngế kăn xua tơnêi têa tơbleăng, 5 ngế xua kong pơlê tơbleăng. Sap ing apoăng hneăng troh nôkố, Khu kăn Kuô̆k hô̆i kong pơlê hiăng pơkuâ hnối tơrŭm ƀă mâu kơkoan ki ai tơdjâk tơkŭm po 20 rôh po hneăng hôp xo rơkong veăng tơpui tối tung 56 kơxop hlá mơéa Luât, Luât xiâm.

Diâp reăng ăm mâu kăn Kuô̆k hô̆i kong pơlê Dak Lak hneăng má 14

Tơdroăng ki trâm mâ kuăn pơlê tung hneăng hơnăm châ Khu kăn pêi pro kơtăng hơ’lêh nếo tiô troăng ki ai pơxúa. Khu kăn hiăng tơkŭm po 140 rôh po hôp trâm mâ kuăn pơlê, ƀă lối 23 rơpâu ngế kuăn pơlê veăng ai mâ ƀă 2.950 ngế veăng tơpui. Rơtế amê, Khu kăn Kuô̆k hô̆i kong pơlê Dak Lak hiăng tơmâng ngăn troh hnoăng cheăng rêh ối pơlê pơla, malối cho mâu rơpŏng ki ai troăng hơlâ tŏng kum, rơpŏng ki ai hnoăng ƀă kăch măng, rơpŏng hdroâng kuăn ngo ki ai tơdroăng rêh ối xơpá, kơpong hngế hngo ƀă hên ki ê.

Tung 5 hơnăm hdrối nah, Khu kăn Kuô̆k hô̆i hiăng mơhnhôk tơkŭm pôu kơ-êng, mơjiâng pro mâu kế tơmeăm ki ai pơxúa kum ăm tơdroăng rêh ối a kong pơlê ƀă tâi tâng kơxô̆ liăn ‘no lối 6 rơtal liăn.

Katarina Nga tơplôu ƀă tơbleăng