VOV4.Sêdang - Klêi 2 hâi pêi cheăng, hâi lơ 14/7, rôh hôp má 58 dêi Vi ƀan pơkuâ Kuô̆k hô̆i hiăng mơgêi hôp. Pôa Vương Đình Huệ, kăn xiâm hnê ngăn Kuô̆k hô̆i tối nhên: troh nôkố, tâi tâng mâu tơdroăng ki kal hbrâ ăm rôh hôp má môi, Kuô̆k hô̆i hneăng má 15 hiăng klêi ƀă hbrâ ăm hâi pơxiâm po cho hâi lơ 20/7 la ngiâ. Pôa Vương Đình Huệ, kăn xiâm hnê ngăn Kuô̆k hô̆i mơnhên tối, rôh hôp kố hăng pro tơdroăng ki tơdâng, môi tuăn khât, malối cho ƀă mâu túa pơkâ 5 hơnăm ‘na mơnhông cheăng kâ rêh ối pơlê, ‘na ‘no liăn tơdjuôm, ‘na liăn ngân tơnêi têa, ‘na túa pơkâ mung mơdrếo liăn chĕn tơdjuôm, ‘no liăn cheăng tơdjuôm iâ khế hơnăm 5 hơnăm hơnăm 2021 -2026.

Xuân môi tiah tơdroăng pơkâ tơnêi têa ‘na mơjiâng thôn pơlê nếo ƀă kơdroh kơtiê krá ton hơnăm 2021 – 2025. ‘Na hbrâ ăm rôh hôp má môi dêi Kuô̆k hô̆i, pôa Vương Đình Huệ, kăn xiâm hnê ngăn Kuô̆k hô̆i pơchân, mâu kơ koan Kuô̆k hô̆i tơrŭm krá ƀă Khu xiâm ngăn pơkeăng ƀă khăm pơlât, mâu kơ koan tơrŭm cheăng Pơlê kong kân Hà Nội hbrâ rơnáu mâu hlá mơ-éa, mâu túa pơkâ hbrâ ví tơtro ƀă tơdroăng ki ôh tá tơniăn dêi pơreăng COVID-19 vâ rak tơniăn khât ăm rôh hôp má môi, Kuô̆k hô̆i hneăng má 15.

Katarina Nga tơplôu ƀă tơbleăng