Ki nhên “Tăng tơkŭm chông pong hmốu Thác Hai’’ ƀă 250 to tơmeăm, mê cho 200 to chông pong rơgi ki lĕm ƀă 50 to tơmeăm ‘na chông pong rơgi; châ Tíu ‘măn rak kế tơmeăm kong pơlê Dak Lak tơrŭm ƀă Tíu ‘măn rak kế tơmeăm khoăng Ton nah Tơnêi têa tăng hlo a Di chỉ khảo cổ học Thác Hai, ối a thôn 6, cheăm Ia Jlơi, tơring Ea Súp, kong pơlê Dak Lak.

Di chỉ khảo cổ học Thác Hai châ hlo apoăng hơnăm 2020, tăng hlo rôh má môi a khế 3 troh khế 4/2021; rôh má péa cho ing khế 11/2021 – 5/2022. Ing mê, mơnhên ‘na tơdroăng túa lĕm tro hbo dâng 2  met, tung dế ai mâu tíu xối tơbâ môi tơnâp tâp, klôh tơnêi prăng rơtế ƀă hên mâu kế tơmeăm ki ê môi tiah: kơƀeăng ki uâ, chông, chông, kơƀeăng pâm kơtôu loăng ƀă hmốu, tơmeăm pro ƀă tơnêi hneăn, tơmeăm ƀă nhĕng, lối 1 rơpâu to chông pong hmốu tŭm túa ƀă lối rơpâu kơtâ  ki ku kŭn.

Tiô mâu khu ki rơkê, tơkŭm ‘măn môi tíu chông pong hmốu Thác Hai châ hlo tơdroăng ki nếo ‘na môi tíu bro chông pong hmốu ki kân ing chal Hậu Kỳ Đá ki nếo a Tây Nguyên.