Khu pơkuâ Văn hok ngê̆ thuât Dak Lak tơkŭm po diâp pri roh tơ’noăng um a Leh tơbleăng kơphế Ƀuôn Ma Thuột má 8, hơnăm 2023 ƀă mơđah tơbleăng mâu tơmeăm ki má môi. Châ mơhnhôk tung tơdroăng po Leh tơbleăng kơphế Ƀuôn Ma Thuột roh má 8, hơnăm 2023 nếo tơkŭm po, bu klêi kơ’nâi 7 hâi, roh tơ’noăng hiăng mơhnhôk 65 ngế a mâu kong pơlê Dak Lak, Dak Nông, Gia Lai, Đà Nẵng ƀă pơlê kong kân Hồ Chí Minh veăng xup um ƀă lối 600 to um krê 1 kơtâ ƀă um tiô khu.

Um châ xup ƀă kơmăi xup um ki dâi lĕm ƀă phôn râng kŏng ki rơkê, xup hên tơdroăng, xup mâu tơdroăng pêi cheăng tung tơdroăng leh tơbleăng. Khu tơkŭm po hiăng rah xo 47 kơtâ um tung mơđah tơbleăng ƀă 20 kơtâ um ki má môi tung kơxô̆ kố châ diâp pri, mê cho 1 pri A, 1 pri B, 2 pri C ƀă 16 pri mơhnhôk. Klêi kơ’nâi leh diâp pri, 47 kơtâ um ki má môi châ mơđah tơbleăng a troăng kơxop mơ-éa kơphế Ƀuôn Ma Thuột sap ing kố troh tâi hâi lơ 22/4 la ngiâ.