*** Kơxo lơ 12/3, a pơlê kân Liên Sơn, tơring Lak, kong pơlê Dak Lak hiăng po rôh tơ’noăng vo plong loăng a long Lak rôh má 3, hơnăm 2023. Kố cho môi tung 18 tơdroăng cheăng ki châ tơkŭm po tung rôh po Leh tơbleăng kơphế Ƀuôn Ma Thuột rôh kố ai 5 tíu pêi cheăng veăng ƀă 86 ngế tơ’noăng lo ing mâu cheăm, pơlê kân ƀă kơpong ôm hyô a tơring Lak.

Mâu ngế tơ’noăng vâi tơ’noăng a 3 tơdroăng ki xiâm mê cho: tơ’noăng vo plong 4 ngế, tơ’noăng vo plong 3 ngế ƀă tơ’noăng vo plong péa ngế. Rêm rôh tơ’noăng xŏn 300m. Mơgêi rôh tơ’noăng, khu tơkŭm po hiăng diâp 3 pri ối má môi, 3 pri ối má péa, 3 pri ối má pái ƀă 6 pro mơhnhôk a mâu tơdroăng tơ’noăng, pơlê kân Liên Sơn châ kâ pri ối má môi tung tâi tâng khu.

Tiô khu tơkŭm po, rôh tơ’noăng vo plong kố pơtối hdró tơdroăng ki hơ’lêh nếo tung hnoăng cheăng rak vế mơdêk mâu tơdroăng ki kơnía khôi hmâ ton xŏn ƀă tơdroăng ki lĕm tro dêi mâu hdroâng kuăn ngo a tơring, ăm mâu tơdroăng ki kơnía ‘na mơhno túa lĕm tro vêh ƀă tơdroăng rêh ối kuăn pơlê ƀă tơmối. Rơtế ƀă rôh tơ’noăng vo plong, mâu hâi hdrối a tơring Lak xuân po hên tơdroăng ki hơniâp ro ‘na khôi túa lĕm tro mâu hdroâng kuăn ngo, môi tiah: rơkâu xối kơneăng têa, rơkâu xối ivá ăm rui, mơdĭng ju plong, tŏn chêng koăng, tơkŭm pro hơkôp ƀă mơđah tơbleăng tê kế tơmeăm khôi vâi krâ ƀă hên ki ê.

*** A Tíu xiâm Leh tơbleăng kơphế Bản Đôn, cheăm Krông Na, tơring Ƀuôn Đôn (Dak Lak), tơkŭm po Leh mơđah rui Ƀuôn Đôn. Tơdroăng ki kơnía kố hiăng mơhnhôk rơpâu ngế kuăn pơlê tung tơring rơtế ƀă tơmối tung tơnêi têa ƀă kong têa ê veăng. Veăng leh mơđah rui Ƀuôn Đôn hơnăm kố ai 7 to rui hngêi dêi mâu ngế pât rui troh ing mâu tíu tê mơdró, rơpŏng tung tơring Ƀuôn Đôn.

Phá ƀă mâu roh leh mơđah hdrối nah, Leh mơđah rui Ƀuôn Đôn hơnăm kố ôh tá ai mâu tơdroăng pro môi tiah: Rui tơ’noăng kơtâu, rui kơtú ƀa long, to rui tơkâ têa kroăng Srêpôk; teăng mâ cho mâu tơdroăng ôm hyô lĕm ƀă rui dế châ mâu kŏng ti ôm hyô tung lâp plâi tơnêi pêi pro, môi tiah: Tơ’noăng rơnuâ ăm rui, Rui veăng koh mâu ngế ngăn ki lĕm má môi, chĕm ăm rui kâ hên tơmeăm, xup um rơtế tơmối.

Mơgêi roh tơ’noăng, rui Khăm Sing dêi ngế pât rui Y Wưn Ƀyă rơkê châ kâ má môi a tơdroăng rơnuâ ăm rui. Pakĭng mê, Khu tơkŭm po hiăng diâp hên pri tơ’nôm ăm mâu ngế pât rui ƀă rui veăng leh mơđah rui.

*** A Kơpong tíu ôm hyô kong kế nhâ loăng Kŏ Tam, pơlê kong kơdrâm Ƀuôn Ma Thuột, Khu tơkŭm po leh mơdĭng kơphế Ƀuôn Ma Thuột tơkŭm po Rôh tơ’noăng pong rơgi kuăn mơngế ing loăng kơphế. Rôh tơ’noăng pong rơgi pro kuăn mơngế ing loăng kơphế kố tơ’mot 53 ngế ngê̆ nhân lo ing mâu tơring, pơlê kong kơdrâm tung kong pơlê Dak Lak ƀă mâu kong pơlê Dak Nông, Gia Lai, Kon Tum ƀă Lâm Đồng veăng.

Tung 3 hâi kố nah, mâu ngê̆ nhân hiăng tơkŭm tâi hâi chôu ƀă ivá vâ pong rơgi chiâng mâu kuăn mơngế ƀă mâu inâi ‘na tơdroăng rêh ối, cheăng kâ dêi mâu kuăn pơlê hdroâng kuăn ngo Tây Nguyên, tơdroăng ki rak vế kong prâi tơnêi tơníu, rak vế mâu kuăn kiâ ki kơnía git, tơdroăng ki rơhêng vâ kơdo mơ-eăm, mơdêk ki kơnía dêi mâu kế tơmeăm kơphế ƀă mâu kế tơmeăm ki châ pong rơgi vâ rơnuâ kum tung tơdroăng rêh ối.

Mơgêi rôh tơ’noăng, khu tơkŭm po hiăng diâp 1 pri ối má môi, 2 pri ối má péa, 3 pri ối má pái, 5 pri mơhnhôk ăm 11 ngế kế ki vâi pong rơgi châ kâ pri, diâp pri dêi mâu tíu pêi cheăng tŏng kum ăm 15 to um ki vâi pong rơgi, diâp hlá mơ-éa mơnhên ăm mâu ngê̆ nhân ki veăng tung rôh tơ’noăng.