Ƀă inâi “Ƀuôn Ma Thuột – Tíu tơkŭm 3 tơdroăng ki rơkê kơphế lâp plâi tơnêi” tơdroăng mơdĭng prôk a troăng kơphô̆ tung rôh po mơdĭng kơphế Ƀuôn Ma Thuột rôh má 8 hơnăm 2023 po a kơxê lơ 10/3, a 6 to hơlâ troăng Ƀuôn Ma Thuột, hiăng pơtroh mâu kuăn pơlê ƀă tơmối ai môi tơdroăng ki ngăn hơniâp ro, phiu niu. Tơdroăng prôk chêng a troăng kơphô̆ ai 3 tơdroăng: Cho ‘na tơdroăng ki pơxiâm tơkŭm po, prôk a troăng ƀă tơdroăng ki châ trâm hlo tơpui tơno.

Ing mâu tơdroăng, khu kố hiăng pơkuâ djâ mâu ngế ki ngăn châ hlo mâu khôi túa ki lĕm ‘na mơhno túa lĕm tro, kế tơmeăm kơnía git dêi kơpong tơnêi, kuăn mơngế Tây Nguyên tối tơdjuôm ƀă Dak Lak tối krê; ôu eăng ki kơnía dêi kloăng kơphế, ngế ki pêt kơphế, uâ pơliê ƀă tê mơdró kơphế.

Pôa Võ Văn Cảnh, Kăn phŏ hnê ngăn Vi ƀan kong pơlê Dak Lak tối nhên: Leh prôk a troăng châ tơkŭm po ƀă tơdroăng ki rơhêng vâ djâ troh mâu tơdroăng ki lĕm ‘na mơhno túa lĕm tro dêi kơpong tơnêi, kuăn mơngế Tây Nguyên tối tơdjuôm ƀă Dak Lak tối krê; ‘na môi tơnêi Dak Lak rơkê, a chê hmâ ƀă hâk vâ kơ tơmối, vâ pơ-ô pơ-eăng ki kơnía dêi kloăng kơphế, ngế ki pêt kơphế, uâ pơliê, tê mơdró kơphế.