Tiô pơkâ pêi dêi Khu pơkuâ cheăng Đảng kong pơlê Dak Lak, kong pơlê kô tơkŭm po leh tơbâ 120 hơnăm mơjiâng a hâi lơ 22/11 hơnăm kố. Tơdroăng ki kal mê cho tơdroăng ngê̆ thuât koh phiu ro ƀă tơdroăng mơđah tơbleăng pĕng mlŏi reăng ki a’nâi.

Rơtế ƀă mê cho hôp tơpui tơno khoa hok ‘’Dak Lak – 120 hơnăm mơjiâng ƀă mơnhông mơdêk’’; Mơđah tơbleăng mâu tơdroăng châ tơƀrê cheăng kâ – rêh ối pơlê pơla; kơchơ mơđah tơbleăng tê mơdró ki dâi lĕm ƀă tơbleăng tơmeăm OCOP; tơdroăng Leh mơdĭng rơnuâ ƀă dó inâi ‘’Dak Lak, Ƀeăn ƀĕng – Tơmiât pêi rơkê – Mot tơrŭm’’, mâu roh tơ’noăng um ngê̆ thuât ƀă tơ’noăng mơ’no tơdrêng tung um tiô troăng măng ti tăng plĕng tơdroăng mơnhông 120 hơnăm mơjiâng, mơnhông kong pơlê Dak Lak. Mâu tơdroăng mơđah tơbleăng sap ing khế 3 la ngiâ ƀă tơkŭm hên tung 3 khế mơ’nui hơnăm 2024.

A roh hôp khu râ kăn pơkuâ kong pơlê Dak Lak pơkâ thế mâu tíu cheăng thâ pêi pro mâu tơdroăng xiâm tiô pơkâ pêi; tơdrêng amê, pêi pro kĭ troăng pêi, tơmeăm, tơdroăng cheăng ki má môi; mơjiâng tơdroăng nghê̆ thuât tơniăn pơkâ pêi, tơdroăng xiâm, troăng pêi ki tơtro.