Tung hngêi trá xŏn dêi rơpŏng ngoh Y Wôn Knul, ối tối cho Pâ Nhiên, a pơlê Akŏ Dhông, pơlê kong kơdrâm Ƀuôn Ma Thuột, ai môi khu vâi rơtăm dâng 10 ngế dế hơniâp ro pơtâp, hriâm tŏn chêng koăng, ai drêng ‘nâ tŏn chêng kơlá, drêng ‘nâ tŏn chêng hlái, ai drêng ‘nâ tŏn không, xuân ai drêng ‘nâ hlŭm rơvŏng ƀă hơ’muăn hdrôu.

Ngoh Y Wôn Knul ai tối tiah kố, rế hía hlo ai rế hên mâu tơmối troh a Ƀuôn Ma Thuột vâ hmâng mâu tơdrá chêng koăng, tí tăng hlê plĕng ‘na khôi túa, vêa vong dêi hdroâng Rơđế.

Ki rơhêng vâ tối, tung roh leh tơbleăng kơphế la ngiâ, khu ki po tơdroăng ôm hyô hiăng ai vâ chê tâi tơmối ki hiăng pâ thế hdrối, kô mơđah ăm vâi ki mê ah châ ngăn, châ hmâng:

‘’Hbrâ ăm leh tơbleăng mê nhŏng o i ngin xuân hiăng hbrâ chôu phut, hâi khế vâ rơtế dêi pó pơtâp, hriâm tŏn chêng koăng, mâu prôa, rơvŏng hlŭm dêi kuăn ngo tá troh a mâu tơdroăng hơdruê tơdrá k’kưt, hơ’muăn hdrôu, rơngê rơngối, mâu têng nêng dêi kuăn ngo tơná Tây Nguyên, ‘na mâu ƀai chêng tối tơdjuôm, tung mê ai tá tơdrá prôa không, rơvŏng 1 klŏng, rơvŏng 6 klŏng, hơdruê k’kưt, rơngê rơngối vâ mâu tơdroăng ki mê châ lĕm ro, mơđah tơbleăng, mơhno tối dêi khôi túa, vêa vong hdroâng kuăn ngo tơná, ƀă xuân rơhêng vâ ‘nâi plĕng tơdroăng ki pói vâ châ tơmâng dêi mâu nhŏng o, tơmối ki troh hmâng, troh ngăn akố’’.

Cho tíu ki po ôm hyô mơhno túa lĕm tro a pơlê kong kơdrâm Ƀuôn Ma Thuột, tung mâu hâi ki kố, pơlê Akŏ Dhông dế ‘mâi rơnuâ hên mâu hngêi trăng, troăng prôk, hbrâ tơdah nhŏng o, tơmối ki troh ôm hêi ngăn a hâi leh tơbleăng kố.

Tơdrêng ƀă tơdroăng hbrâ rơnáu mâu kế tơmeăm, hngêi trăng homestay ƀă mâu kế kâ, tơmeăm ôu, mâu rơpŏng hngêi tung pơlê ối ‘mâi rơnêu hngêi trá xŏn, ‘mâu rơnêu i lĕm bo cheăng, kơnâng, pik mơngiơk, rơnêu mâu kơ-ƀeăng ki tâ pá ngiâ bo cheăng, tâp mâu um ki vâ mơhno tối ăm tơmối tơ’lêi hlâu vâ tí tăng prôk troh a tíu ki ôm hyô, châ mot tung pơlê tơniăn.

Nâ H’Tit Aliô̆, ối a pơlê Akŏ Dhông ai tối, rơpŏng nâ hiăng ‘no dêi 400 rơtuh liăn vâ ‘mâi rơnêu hngêi trăng dêi rơpŏng tơná, hbrâ vâ tơdah tơmối mot pơtê pơto, lơ pôu ngăn, ôu kâ. Nâ H’Tit Aliô̆ ai tối tiah kố:

‘’Rơnó leh tơbleăng kố ga ai tơdjâk ti xê to kơphế mê ối vâ mơđah tơbleăng tâi tâng khôi túa lĕm tro dêi hdroâng Rơđế a Ƀuôn Ma Thuột mê kuăn pơlê hơniâp ro ƀă phiu niu dế tơkôm hâi ki mê. Á hlo tung pơlê kố thăm rế tâ ro tâ, vâi dế thâ pêi pro mâu tơmeăm, tơdroăng ki vâ xah ôm hêi a Festival kơphế kố. Pơlê cheăm ai mâu tơdroăng cheăng mơđah tŏn chêng koăng, pơchên kế kâ, lăm ôu kơphế tê kơtê.

Tung pơlê ai mâu rơpŏng hngêi, môi tiah mâu hngêi mơdró kơphế Ay Ray, Tăng Bi, Arul, hngêi mơdró kơphế Akŏ Dhông xuân hiăng hbrâ rơnáu thâ ăm tơdroăng po Festival roh kố’’.

A mâu pơlê cheăm tung kong pơlê Dak Lak, kuăn pơlê xuân hiăng hbrâ hên mâu tơdroăng ki vâ pêi pro, ing mê thăm mơnhông tơ’nôm khôi túa lĕm tro tung leh tơbleăng kơphế, môi tiah Hâi Mơhno túa lĕm tro-tơ’noăng ivá kuăn ngo, tơkŭm po rơkâu xối tiô khôi vâi krâ roh nah môi tiah tĭng xối kơno têa, tĭng rơkâu ivá, rơkâu ivá ăm rui ƀă hên hĕng rơkâu xối ki ê.

Tiô ngoh Thiên Adrơng, môi ngế ki pơkuâ ngăn ‘na ôm hyô a pơlê kong kơdrâm Ƀuôn Ma Thuột tối, ngoh hiăng chêh bro hdrối troăng prôk, tơdroăng ki vâ lăm ôm hyô, pơtê pơto tro tiô khôi hmâ dêi pơlê vâ tơmối, nhŏng o châ hlo, châ ngăn ‘na ki lĕm ro, châ trâm, tơpui tơno ƀă kuăn pơlê, mâu tơdroăng ki xiâm tiô khôi hmâ dêi pơlê cheăm.

‘’Ngăn tiô kơ tơdroăng ki hiăng pơkâ kô pêi pro ti lâi ti lâi dêi Leh tơbleăng kơphế mê kô ai tơ’nôm mâu tơdroăng ki ôm hêi a Ƀuôn Ma Thuột, tơdroăng ki ôm hêi a tơring Lăk ƀă a Ƀuôn Đôn. Rêm tíu kô ai mâu khôi túa, vêa vong krê xêh, tiô kơ tơdroăng ki tơmối troh a kố kô châ trâm mâ, tơpui tơno, châ hlo, châ ngăn vâ ‘nâi plĕng nhên tâ ‘na kuăn pơlê, tơdroăng krip krê xêh, mâu tơdroăng ki lĕm tro dêi tơrêm hdroâng kuăn ngo, rêm pơlê cheăm. Pin kô tơrŭm ƀă mâu kuăn pơlê ki rêh ối amê vâ vâi tối tơbleăng, vâi kô hơ’muăn tối mâu tơdroăng ăm tơmối’’.

Leh tơbleăng kơphế Ƀuôn Ma Thuột roh má 8 kố châ hên ngế kuăn pơlê a Dak Lak dế tơkôm hmăng tung hiâm mơno dế rơ-rêk, mơdrốu xuân tâ phiu ro há. Tung pơla dế hơniâp ro, sôk phiu dêi ‘’Khế 3 Tây Nguyên’’, mâu pơlê cheăm hiăng hbrâ rơnáu tŭm vâ rơtế dêi pó mơjiâng chiâng môi hneăng leh tơbleăng ki lĕm ro, tro khâp, trâu rơdâ ‘na kơphế tiô khôi túa, vêa vong dêi vâi krâ roh nah la xuân tơtro ƀă chal nếo ki krip lĕm hâi kố há.