Kơxo lơ 19/4, Khu ngăn mơhno túa lĕm tro Tơ’noăng ivá ƀă Ôm hyô Dak Lak tơkŭm po leh pơxiâm po tơdroăng tơkêa “Rak vế ƀă mơdêk ki kơnía ‘na mơhno túa lĕm tro a kong pơlê Dak Lak” xua peăng Hàn Quốc tŏng kum ƀă tâi tâng kơnâ 55 rơpâu dollars, pêi pro tung hơnăm kố. Tung tơdroăng pêi pro tơkêa, Dak Lak kô tơkŭm po mâu lâm hnê tơdroăng ki xiâm ‘na Rơkong tơpui pơchuât ăm droh rơtăm Rơđế a tơring Čư̆ Mgar; hnê tŏn chêng koăng hlối tơrŭm ƀă xuăng ăm mơngế Jarai a tơring Ea Hleo. Hbru 5 kơtum chêng Jarai ƀă Rơđế ăm mâu tơring Ea Hleo, Krông Năng, Čư̆ Mgar, pơlê kong krâm Ƀuôn Hồ ƀă pơlê kong kơdrâm Ƀuôn Ma Thuột.

Hbru 124 ưplâ ếo pơtâk Rơđế, Jarai ăm mâu khu ki tŏn chêng, đô̆i ki hơdruê xuăng a mâu cheăm tơring. Tơbleăng tơkŭm, chêh xo, thâu hrik mâu ƀai rơkong tơpui pơchuât, rah chêh, tơplôu pơla Xuăn – Rơđế; mơ’no ăm pơchuât mơ-éa ƀă phim ‘na rơkong tơpui pơchuât vâ kum hnoăng cheăng hnê tối ƀă rak vế mâu tơdroăng ki kơnía ‘na mơhno túa lĕm tro a kong pơlê.