Hôp tơno ai tơdroăng ki veăng dêi mâu tíu cheăng, kơvâ cheăng, kong pơlê, mâu ngế ki rơkê, khu tê mơdró ƀă tíu pêi cheăng tung kơvâ ôm hyô. Tiô mơ-éa chêh hdrối tơdroăng tơkêa bro, Dak Lak mơnhên troăng la ngiâ mơnhông ôm hyô tiô troăng ngiât lĕm, krá tơniăn, ƀă rak vế ki kơnâ khôi túa lĕm tro tung pơlê, kế tơmeăm kong kế ƀă mơjiâng tơmeăm ôm hyô ki phá tơ-ê dêi kơpong Tây Nguyên.

Mâu tơmeăm ki xiâm châ mơnhên cho ôm hyô ngăn loăng pơlái kong kế, pơtê, châ tâ châ hlo khôi túa lĕm tro pơlê pơla, ôm hyô pêi chiâk deăng, ôm hyô kơphế, ôm hyô ngăn rui ki lĕm ƀă ôm hyô ƀă tíu khôi túa lĕm chêng koăng Tây Nguyên. A hôp tơpui tơno, mâu kăn teăng mâ tối Dak Lak ai hên tơmeăm mơnhông ôm hyô kơnôm tơmeăm kong kế, xí, long têa ki ai xêh rơtế khôi túa lĕm tro ki phá tơ-ê dêi Tây Nguyên.

Laga, ôm hyô Dak Lak xuân ai hên tíu ki kreăng môi tiah hngêi trăng troăng klông tá hâi tơdâng tơ’mô, ôh tá tŭm tơmeăm ki dâi lĕm, mơdró ôm hyô a kơmăng ối iâ ƀă tá hâi ai hên khu tê mơdró mơ’no liăn cheăng ki ó rơdêi má môi ƀă ivá troh lâp lu. Kong pơlê kal pơhlêh pro hngêi trăng, troăng klông, séa ngăn inhên mâu ki klâi dế ai vâ mơnhông mơdêk ki râ kân; kơjo mâu tơmeăm djâ ki tơbâ pâ vế tung ngoâ ki phá tơ-ê.