Sap ing kơxo má, tung plông ƀơrô pêi cheăng mơhno khôi túa lĕm tro ƀă tơdroăng kal pơlê pơla tơring Ea Hleo, kong pơlê Dak Lak hiăng kơdrâm phiu ro, kơdrâm kơdrĕng. Rêm tơdroăng pêi cheăng châ xing xoăng a mâu kơpong phá tơ-ê dêi pó môi tiah: kơpong mơđah tơbleăng tíu chô kơxôp hlá mơ-éa  ƀă tơmeăm STEM, kơpong mơđah tơbleăng um nghê̆ thuât tiô dó inâi, kơpong tíu vâ ti tăng plĕng kơxôp mơ-éa ƀă khôi túa pơchuât mơ-éa, trâm mâ tơbleăng mâu ngế chêh mơ-éa ƀă hneăng tơ’noăng hơ’muăn tiô kơxôp mơ-éa. Rêm kơpong pơrá mơhnhôk kơdrâm hok tro ƀă thái cô, nôu pâ hok tro veăng, séa ngăn. Hâk vâ râng kơxuô tơmeăm nếo châ, o Bùi Trần Bảo Thư, hok tro lâm 6A5, Hngêi trung râ má péa Lê Quý Đôn, pơlê kân Ea Drăng, tơring Ea Hleo tối:

‘’Sap ing kơxo troh nôkố á veăng ngăn hơdruê xuâng, tơdah kơxôp mơ-éa, trâm mâ rơtế ƀă ngế chêh văn, ƀă xah mâu tơdroăng xah hêi, ti tăng plĕng khôi túa pơchuât mơ-éa. Tung mâu tơdroăng mê á hâk má môi cho xah tơdroăng xah hêi, châ tâ khôi túa hriâm xua ai hên roh tơ’lêi hlâu pơxúa, ƀă phiu ro nếo. Á vâ hngêi trung tơkŭm po hên tơdroăng ki kal ƀă xah hêi ăm mâu pú hmâ xah hêi khu vâ ai tơ’nôm ki rơkê plĕng ƀă xah hêi’’.

Ôh tá xê châ xah mâu tơdroăng xah hêi phiu ro, pơxúa, mâu hok tro veăng tơdroăng ối châ tơdah mâu kơxôp mơ-éa văn hok nghê̆ thuât ăm vâi hdrêng ối kŭn. Mâu tơdroăng xiâm châ tóoi ăm dêi pó ‘nâi ing mâu ngế ki châ krếo troh xuân kum hok tro hlê plĕng hên tâ ‘na ki kơnâ dêi tơdroăng pơchuât kơxôp mơ-éa, ing mê mâu vâi o hâk vâ tâ ƀă tơdroăng pơchuât ƀă ti tăng plĕng tơdroăng ki rơkê ing kơxôp mơ-éa. O Phan Thị Phương Thúy, hok tro lâm 9A, Hngêi trung râ má pái hdroâng kuăn ngo ai tiú kâ koi ối pơtê tơring Ea Hleo tối:

‘’Á tâng mâu ngế chêh thơ, ngế chêh văn xông tơpui cho rơkê ‘nâng ƀă tâ hâk vâ ‘nâng mâu xă, tăm mê. Ai hên khu cho rơkê ‘nâng, hơ’muăn tơdroăng Pôa Hồ tâ rơrêk tung hiêm mơno. Á tâ hâk ƀă vâ dêi tơná châ môi tiah mê. Á xuân iâ pơchuât kơxôp mơ-éa xua ôh tá hâk vâ hên ôh, ki hên á o pơchuât kơxôp ‘na hiêm mơno ƀă kơxôp mơ-éa văn hok mê á o iâ pơchuât. Laga nôkố tâng mâu xă, tăm tối mê á tâ hâk vâ tâ, hlo hâk kơxôp mơ-éa tâ ƀă hâk nâl văn tâ’’.

Tiô pôa Nguyễn Huy Dũng, Kăn pơkuâ ƀơrô pơkuâ khôi túa lĕm tro ƀă tơdroăng kal pơlê pơla tơring Ea Hlao, mơhnhôk Hâi kơxôp mơ-éa ƀă khôi túa pơchuât mơ-éa hơnăm 2023, tơring hiăng ai pơkâ pêi pro hên tơdroăng pêi cheăng. Ki má môi mơtiah: tơkŭm po pơxiâm po Hâi leh ƀă dó inâi ‘’Kơxôp mơ-éa ƀă rơxông ối nếo’’; mơđah tơbleăng, kum ăm pú hmâ pơchuât 2.500 kơxôp mơ-éa ƀă hên khu mơ-éa môi tiah: Kơxôp mơ-éa văn hok vâi hdrêng, kơxôp mơ-éa khoa hok ki apoăng, kơxôp mơ-éa vâ pơchuât ngăn; kơxôp mơ-éa ‘na rêh ối, kơxôp mơ-éa khoa hok kih thuât, luât, y hok, tạp chí, kơxôp mơ-éa hlá tơbeăng. Mơđah tơbleăng um nghê̆ thuât ƀă um kơchuâ ‘’Ea Hleo lĕm’’; Tơkŭm po mâu tơdroăng xah hêi tiô khôi vâi krâ nah; tơpui tơdjêi phiu ro ai mơhá pri; trâm mâ tơpui tơno ƀă mâu ngế chêh văn, hngêi khôp; hneăng tơ’noăng hơ’muăn tiô kơxôp hlá mơ-éa, ƀă hía hé. Tơdroăng hiăng tơdah châ tơdroăng tơmâng tŏng kum, veăng dêi vâ chê 1.000 roh ngế hok tro ƀă thái cô a mâu hngêi trung râ má péa, râ má pái tung lâp tơring. Rơtế ƀă mê, tơring xuân tơmâng troh mâu hok tro kơpong pá puât ƀă hên tơdroăng mơhnhôk tơ’noăng, troh lâp lu khôi túa pơchuât mơ-éa a mâu hngêi trung. Pôa Nguyễn Huy Dũng tối ăm ‘nâi:

‘’Ngin ai pơkâ pêi cho troh lâp lu ‘na mâu hngêi trung hriâm, klêi mê mâu tơring, tung mê ai doâp kơxôp mơ-éa ăm mâu tíu chô ‘măn kơxôp mơ-éa xuân môi tiah veăng tơlo kơxôp mơ-éa klêi mê diâp ăm mâu muăn ai tơdroăng rêh ối pá puât mê tơdroăng mê kô ton xŏn tung khế 4 kố ƀă mâu hâi khế pơtối nếo’’.

Djâ kơxôp mơ-éa troh a kŏng hok tro kơpong hơhngế hơhngo xuân cho môi tung mâu tơdroăng pêi ki má môi dêi Khu pơkuâ Văn hok nghê̆ thuât Dak Lak mơhnhôk Hâi kơxôp mơ-éa ƀă khôi túa pơchuât mơ-éa hơnăm kố. Jâ Niê Thanh Mai, Kăn hnê ngăn Khu tối ăm ‘nâi, pơcháu hnoăng dêi Khu pơkuâ Văn hok Việt Nam, Khu pơkuâ Văn hok nghê̆ thuât Dak Lak hiăng diâp hrĭng kơxôp mơ-éa mơ-éa văn hok nghê̆ thuât tung tơdroăng tơkêa bro ‘’Diâp kơxôp mơ-éa văn hok nghê̆ thuât ăm vâi hdrêng kơpong hơhngế hơhngo’’ ƀă tơkŭm po hên tơdroăng trâm mâ, tơpui tơno ƀă ngế chêh kơxôp mơ-éa. Jâ Niê Thanh Mai pói tơngah, ing mê hok tro kô ai tơdroăng châ achê tâ ƀă hên tâ ƀă kơxôp mơ-éa, ing mê mơdoh hên chô tâ ăm tơdroăng pơchuât kơxôp mơ-éa, ti tăng plĕng rêm kơtâ kơxôp mơ-éa.

‘’Djâ kơxôp mơ-éa troh ƀă kơpong hơhngế hơhngo ƀă ai mâu tơdroăng diâp kơxôp mơ-éa xuân môi tiah cho mâu tơdroăng vâ troh lâp lu tuăn pâ, ‘na kơxôp mơ-éa ƀă hok tro a kơpong hơhngế hơhngo. Ki rơhêng vâ tối cho hơnăm kố ƀă tơdroăng tơkêa bro kơxôp mơ-éa diâp ăm vâi hdrêng kơpong hơhngế hơhngo, kơpong vâi krâ hdroâng kuăn ngo mê Khu pơkuâ Văn hok Việt Nam hiăng pơtroh 4.000 kơxôp mơ-éa a Dak Lak ƀă rơtế Khu pơkuâ văn hok nghê̆ thuât Dak Lak hiăng troh mâu hngêi trung tung tơring, ki rơhêng vâ tối tơmiêt troh mâu hngêi trung hriâm a mâu pơlê mê ai hok tro cho hdroâng kuăn ngo’’.

Ôh tá xê to tung tơdroăng mơhnhôk Hâi kơxôp mơ-éa ƀă khôi túa pơchuât mơ-éa, tơdroăng djâ kơxôp mơ-éa troh rêm toăng hngêi trung, ki má lối cho mâu hngêi trung a kơpong hơhngế hơhngo dế châ hên tíu cheăng a Dak Lak pêi pro ing mâu tơdroăng môi tiah Tíu chô ‘măn kơxôp mơ-éa ki troh lâp lu, Bâ eăng tuăn ngôa rơkê, Hngêi trung mơjĭng. Ing mê, tơmiêt troh pơkâ mơhnhôk ƀă mơnhông mơdêk khôi túa pơchuât mơ-éa tung pơlê pơla, mơjiâng tơdroăng ki hmâ pơchuât kơxôp mơ-éa, kum mơnhông mơdêk khôi túa pơchuât mơ-éa rế châ tơƀrê tâ ƀă păng ‘nâng./.