Sap hâi lơ 27/4 troh hâi lơ 2/5, Tiu tơbleăng um tơmeăm kong pơlê Gia Lai tơkŭm po “Măng tĭng Túa lĕm tro kế kâ hơnăm 2023’’.  A kố ai 25 tíu tơbleăng tê tơmeăm, mơhno ăm tơmối hlo mâu tơdroăng ki lĕm tro ‘na kế kâ phá krê xêh dêi hên kơpong, tơdrêng ƀă mâu tơdroăng hơdruê xuăng, rêi prôa, on trâ hên mơngiơk. 

Mâu kơchâi kâ ki krê dêi kơpong Tây Nguyên môi tiah í pôh, tơxông prông, trŏng xăng, kơchâi mŏn... ƀă hên mâu kơchâi ki ê tơbleăng drô troăng kơphô̆ môi tiah kơƀăn bèo, kơƀăn tai vạc, kơƀăn lọc kơxuô ƀă hlá priât túa Huế, mâu kơpáu ki pế túa Siam... hiăng pro ăm tơmối mơnúa kâ vâ ‘nâi ki kơhiâm.  

Pakĭng mâu tíu tơbleăng kế kâ vâ tơmối mơnúa kâ a mê, Măng tĭng Túa lĕm tro ối ai mâu tíu tơbleăng tơmeăm krê dêi kuăn pơlê Gia Lai môi tiah kơphế, tiu, mắc-ca, kloăng plâi hôt hiăng têng khăng, mâm ro têng môi hdroh kong tô, yến sào, châ hên tơmối ngăn vâ rôe kâ.