Bu môi to xơkê kŭn, heăn, môi to loăng vâ pong rơgi, klêi kơ’nâi môi phut ngăn xiâm loăng kơphế, ngê̆ nhân Y Ser ɃKrông, ối a Ƀuôn Tơng Jú, cheăm Ea Kao, pơlê kong kơdrâm Ƀuôn Ma Thuột hiăng tơmiât ‘nâi tơmeăm ki vâ mơjiâng pro. Ôh tá kal kơchuâ hdrối, ngoh tiô tơdroăng ki tơná hiăng chiâng pêi sap ing ton nah rĕng pong rơgi loăng pro chiâng tơmeăm ki lĕm.

Um ki ngoh pong rơngi chôa ‘lâng chiâng um klêi kơ’nâi to lâi phut pong rơgi. Rế pong rơgi, ngoh Y Ser ɃKrông hlối tối tơbleăng:

“Kố cho um ngế kơdrâi lăm hnêng têa. Kố cho um pong rơgi dêi mơngế Tây Nguyên, á vâ mơhno tơdroăng rêh ối dêi pơlê ton nah. Á séa ngăn xiâm loăng môi tiah lâi klêi mê á tơmiât troh vâ pong rơgi pro ki klâi, ing xiâm loăng mê á tơmiât vâ pong rơgi dêi mơngế kơnốu râng tơkâ lơ ngế kơdrâi dế hum lơ ngế kơdrâi pôu chêa lăm a chiâk deăng, tiô kơ loăng’’.

A hneăng tơ’noăng pong rơgi loăng ing xiâm kơphế châ tơkŭm po tung tơdroăng leh tơbleăng kơphế a pơlê kong kơdrâm Ƀuôn Ma Thuột roh má 8 pơla kố nah, ai 53 ngế ngê̆ nhân troh ing mâu tơring, pơlê kong krâm, pơlê kong kơdrâm tung kong pơlê Dak Lak ƀă mâu kong pơlê kơpong Tây Nguyên  veăng tơ’noăng.

Ƀă dó inâi “Khôi túa lĕm tro, ngê̆ thuât, loăng pơlái kong kế, kuăn mơngế Tây Nguyên” hên ngế ngê̆ nhân hiăng xúa ngê̆ thuât pong rơgi loăng tiô khôi vâi krâ nah vâ pong rơgi loăng. Mâu um ki hmâ môi tiah; um a leh tơbleăng, khoh niân tiah hâi kố kơnôm vâi krâ nah, tŏn chêng koăng, tơdroăng pêi báu, pôu kuăn, lăm ngăn chiâk deăng châ ngê̆ nhân mơhno bro.

Ngê̆ nhân Y Dhok Adrơng, a cheăm Chư Suê, tơring Čư Mgar, kong pơlê Dak Lak tối: ki phá tơ-ê dêi um loăng Tây Nguyên tối tơdjuôm ƀă mơngế Rơđế tối krê hmâ xúa mâu loăng ki ‘răng, kơtô, gá ‘răng môi tiah loăng karê, loăng kơchêk, ƀă hía hé vâ pro. Ƀă xiâm kơphế mê thế rah mâu xiâm loăng ki hiăng krâ, lôi ăm khăng ‘nôi nếo chiâng  vâ pong rơgi.

“Loăng kố á pong rơgi um Nôu pôu dêi kuăn. Xua nah drêng ối kŭn rêm rôh lăm a chiâk deăng mê nôu pôu a rŏng. Ƀă pong rơgi loăng mê loăng kân kô tơ’lêi pro tâ. Ƀă mâu xiâm loăng kơphế mê pá tâ, pin pêi tiah lâi rak lĭng gá, pong xuân pá, thế xúa tơdjêp ƀă mâu kơmăi mê nếo chiâng pêi’’.

Bu tung 3 hâi, mâu ngê̆ nhân hiăng kêi 48 tơmeăm pong rơgi ƀă hên tơmeăm ki pro mơhno tơdroăng rêh ối ƀă hiâm mơno dêi mơngế Tây Nguyên. Mâu tơmeăm pêi kêi đeăng châ khu tơkŭm po rah xo xúa tơbleăng tung kơdrum tíu mơđah tơbleăng ôm hyô Kŏ Tam vâ tơbleăng troh kuăn pơlê ƀă tơmối ôm hyô.

Châ hlo, séa ngăn tiô tơdroăng ngê̆ thuât pro um ing pong rơgi loăng ing xiâm loăng kơphế tung mâu hâi tơkŭm po leh hô̆i, ngoh Nghiêm Bá Nam, tơmối troh ing pơlê kong kân Hà Nội tối: kố cho roh apoăng ngoh châ hlo ngê̆ nhân pong rơgi loăng ing xiâm loăng kơphế. Ngoh tâ tơviah xua ing mâu xiâm loăng kơphế tơngah xêh hvât lôi, laga ing kơpeăng kŏng ki rơkê dêi ngê̆ nhân ƀă mâu tơmeăm ki tơ’lêi hlâu kô chiâng pro mâu tơmeăm ki kơnâ:

“Ing mâu tơmeăm xiâm loăng kơphế ki hvât lôi mê mâu ngê̆ nhân dế pro mâu tơmeăm ƀă ki tơná rơkê dêi mâu ngế ngê̆ nhân vâ tơbleăng tơmeăm dêi vâi, cho lĕm ‘nâng. Mâu ngê̆ nhân kô chiâng mâu tơmeăm ki lĕm ƀă chiâng kơnâ ‘na ngê̆ thuât, tâ môi tiah pin chiâng hlo tâi mâu tơmeăm ing xiâm loăng kơphế’’.

Ƀă mâu hdroâng kuăn ngo a Tây Nguyên, pong rơgi loăng cho môi tơdroăng ngê̆ thuât ki má môi sap ing ton nah. Ing mâu rơno loăng ki tá hâi pro ki klâi, ing kơpeăng kŏng rơkê dêi ngê̆ nhân, pro chiâng mâu loăng ki nếo lĕm, pêng păm tơdroăng ki lĕm ƀă ai mơhúa. Ôh tá xê to pong rơgi ing mâu loăng ki kân ton hơnăm, nôkố , mâu loăng pong rơgi ing xiâm loăng kơphế ki hiăng krâ, djâ troh ki kơnâ nếo, ki phá tơ-ê krê ăm xiâm loăng kơphế.