Kơxo lơ 9/3, Khu tơkŭm po Leh tơbleăng kơphế Ƀuôn Ma Thuột rôh má 8 tơkŭm po leh diâp pri ƀă mơđah tơbleăng um ngê̆ thuât “Kơphế Việt Nam – Troăng prôk tơmiât rơkê kế tơmeăm kơnía git mơhno túa lĕm tro lâp plâi tơnêi”. Châ tơbleăng sap ing hâi lơ 23/11 hơnăm nah ƀă ton troh 21/2 hơnăm kố, rôh tơ’noăng um ngê̆ thuât “Kơphế Việt Nam – Troăng prôk tơmiât rơkê kế tơmeăm mơhno túa lĕm tro lâp plâi tơnêi” tung mê ai 4 tơdroăng ‘na kơvâ kơphế Việt Nam, tơmiât troh tơdroăng ki vâ ô eăng kơphế Việt Nam.

Kố xuân cho môi tung 18 tơdroăng cheăng ki xiâm dêi rôh po mơdĭng kơphế Ƀuôn Ma Thuột rôh má 8, hơnăm 2023. Klêi kơ’nâi 3 khế tơbleăng, khu tơkŭm po hiăng châ tơdah xo lối 1.100 um pơtroh tơ’noăng dêi 170 ngế xup lo ing 30 kong pơlê pơlê kong kân tung lâp tơnêi têa veăng tơ’noăng.

Klêi kơ’nâi rah xo hiăng châ rah xo 76 um ngê̆ thuât vâ mơđah tơbleăng tung rôh po mơđah ƀă diâp 15 pri ăm mâu um ki rơkê má môi, tung ai 4 pri malối cho tơdâng ƀă 4 inâi, 10 pri mơhnhôk ƀă 1 pri xua kuăn pơlê rah xo. Tiô mơnhên tối dêi Khu tơkŭm po, ai hên um ki lĕm, kum pro tơdjâk um kơphế Việt Nam, tơdjâk um kơphế Ƀuôn Ma Thuột troh kuăn pơlê hâk vâ kơphế tung lâp plâi tơnêi.