Hâi lơ 24/3, khu pơkuâ ngăn Đoân Droh rơtăm Dak Lak tơkŭm po hneăng hôp hơnăm ối nếo kong pơlê ƀă tơdroăng cheăng ‘na mơhno túa lĕm tro tung mâu hơnăm xúa cheăng kơxô̆.  Ƀă pơxá “ Hơnăm ối nếo Dak Lak ƀă tơdroăng rak vế, tơbeăng túa lĕm tro ton nah mâu hdroâng kuăn ngo rêh ối tung kong pơlê “, po hôp tung tơdroăng phiu ro.

Mâu ngế ki châ krếo hiăng tối hên tơdroăng tơdjâk troh túa lĕm tro hroâng kuăn ngo a tíu mê; tơdroăng pơtối rak vế ƀă mơnhông mơdêk túa lĕm tro a kong pơlê; tung pơla tí tăng hlê plĕng  trâu rơdâ, chêh tơdroăng ‘’na mơhno túa lĕm tro; mâu troăng rơhlâ kŏng ngê̆ vâ tơdah ‘na túa lĕm tro tung rơxông 4.0 nôkố.

Đoân viên Droh rơtăm xuân tối ki tơmiât dêi tơná ‘na túa lĕm tro ton nah; tối ‘na ki xơpá, tơvâ tơvân tung tơdroăng rak vế, tơbleăng túa lĕm tro ton nah mâu hdroâng kuăn ngo a mê tung kong pơlê.