Kơchâi tơpoăng alâi, nâl M’Nông tối dêi Trau Pai, cho kơchâi dêi hdroâng M’Nông a Ƀuôn Đôn châ mơjiâng pro ing mâu kế tơmeăm ki chiâng ai xêh ing kong kế, ngo ngối. Vâ pế kơchâi tơpoăng ki kơ hiâm mê, ti xê to hbrâ tŭm mâu tơmeăm ki kơhiâm ing kong kế, mê ối ai túa ki rơkê tung pế pơchên kơchâi, ngăn tiô kơ rêm kŏng dêi rêm ngế.

Tơmeăm ki xiâm mê, ai tơpăng chôu, kơtĕm xâk, tơpoăng alâi, tơpoăng phái ƀă mâu po, ƀot ngot, kanor. Tơpoăng ki mê athế tâm pro chôu hdrối, tơpoăng phái cho tơmeăm ki ôh tá păng lôi drêng pế pơchên kế kâ kố. Vâi kơdrâi M’Nông pêi phái chiâng tơpoăng vâ pro môi tung mâu tơmeăm ki vâ pế kơchâi tơpoăng.

Ki ahdrối, athế tâm phái tung têa sap ing 30 phut troh 1 chôu. Drêng phái hiăng poh, tơkôm têa xĭng, kui xo phái tâm tâ tung póu, pêi i liê. Dế nôkố xuân chiâng xo phái vâ pêi chiâng tơpoăng, laga, athế ing tơná pêi ƀă kŏng a póu mê tơpoăng nếo  xú kơhiâm.

Nâ H’Nụ Budam, ƀuôn Ea Rông, cheăm Krông Na, tơring Ƀuôn Đôn, kong pơlê Dak Lak tối ăm ‘nâi, vâ khoh pế kơchâi tơpoăng chiâng kơhiâm, mê athế lếo tơpoăng ki hiăng tơvât tung têa, athế rơvâ ăm ga i tơmot lĕm vâ ga tơkâ, drăng kơchâi a kơnoh on xuân athế tơtrro vâ ăm kơchâi tơpoăng chên tơ’mô.

“Kơchâi tơpoăng rế kơhiâm rế tơ’lêi vâ pêi pro cho kơchâi kâ ki kơhiâm hmâ pế a pơlê cheăm pin, xua châ pế pơchên ing tơpăng, alâi, kơtĕm xâk ki hiăng hbrâ hdrối. Kơchâi ki kố châ pế ƀă tơpăng rơtế ƀă alâi ki hiăng chên, kơ’nâi mê, pin athế pêi alâi chiâng tơpoăng, xo têa tơpoăng klêi mê pế pơchên, râm tơ’nôm kơchâi xú hŏm ăm ti lâi ga tơtro, vâ mâu vâi krâ, vâi rơxông nếo ƀă vâi ‘nĕng, jâ pôa ngế ki lâi kâ xuân tro krôk, kô ai tŭm trếo kơhiâm ăm ngế ki kâ”.

Drêng kâ kơchâi ki xú hŏm lĕm ga kô tâ ki kơhiâm. Kơchâi tơpoăng kố xuân chiâng kâ tê kơtê ôh tá eâ kâ ƀă hmê, la xuân chiâng há vâ kâ ƀă hmê. Hên ngế hâk vâ kâ kơchâi kố xua ga hơ-iâ, kơhiâm, ki chôu i iâ dêi tơpăng kâ tơtro ƀă hmê ki rơmuăn. Kơchâi tơpoăng kố kơhiâm ƀă tâ tung klêa xuân rơngiâp lĕm, mê vâi krâ, vâi hdrêng pơrá rơhêng vâ kâ.

Hên ngế M’Nông chiâng pế kơchâi ki kố ƀă ngăn kố cho môi tung mâu kơchâi ki kơnía dêi hdroâng kuăn ngo tơná. Kố cho kế kâ ki ôh tá păng lôi tung mâu roh ki hơniâp lĕm, pơkoăng ŏng mế, lơ mơdâm kiâ tung pơlê, vâi krâ hmâ pế tung mâu roh tơdah tơmối ing tíu hơngế troh vâ tí tăng ‘nâi plĕng ‘na túa kế kâ dêi mơngế M’Nông.

Nâ H’Nụ Budam, ƀuôn Ea Rong, cheăm Krông Na, tơring Ƀuôn Đôn, kong pơlê Dak Lak ai tối:

“Akố ngin hmâ kâ đi đo kơchâi ki kố lơ ai roh ki ôu kâ pơkoăng, êng ŏng mế, lơ rơpŏng hngêi ai mơdâm kiâ mê vâi hmâ pế kơchâi tơpoăng cho kơchâi ki hmâ kâ dêi mơngế M’Nông. Kơchâi tơpoăng kố xuân hmâ pế pơchên vâ kâ rêm hâi, lơ drêng vâ koh tơdah tung pơlê pơla”.

Dế nôkố, tơdroăng rêh kâ ối dêi mơngế M’Nông hiăng kro tâ, la kơchâi tơpoăng ki pế tiah hmâ dêi vâi krâ nah xuân ôh tá păng lôi tung tơdroăng rêh kâ ối rêm hâi. Môi túa kơchâi ki ôh tá xê eâ pá puih tung tăng kê kơchâi lơ pế pơchên la kâ ga hơ-iâ, tơtro krôk, ngế ki lâi xuân chiâng vâ kâ, xua mê, nhŏng o, tơmối tâng troh kô mơnúa kâ ngăn kơchâi tơpoăng M’Nông a Ƀuôn Đôn kô hlê plĕng tơ’nôm khôi túa, vêa vong dêi mơngế kuăn pơlê a tíu kố.