Khu pơkuâ ‘na mơhno túa lĕm tro, Tơ’noăng ivá ƀă ôm hyô kong pơlê Lâm Đồng dế thâ mơjiâng pơkâ tơkŭm po mâu tơdroăng pêi Măng tĭng Leh kơnía  Ôm hyô Lâm Đồng hơnăm 2023. Dó inâi ‘’Lâm Đồng – Kơpong tơbăng kân rơdâ rơdêi’’, Măng tĭng Leh kơnía Ôm hyô Lâm Đồng tiô tối hdrối tơkŭm po sap ing hâi lơ 27/4 troh hâi lơ 3/5 la ngiâ a mâu tơring, pơlê kong kơdrâm tung kong pơlê.

Tung mê, tơkŭm ki hên a pơlê kong kơdrâm Đà Lạt, ƀă hên tơdroăng ki má môi, mơtiah: Leh xah hơdruê xuâng lâp plâi tơnêi; Tíu mơđah tơbleăng khôi túa lĕm tro mâu hdroâng mơngế tung kong pơlê; Tíu tơbleăng tơmeăm kâ ‘’Kơchâi kâ kơhiâm Đà Lạt’’; Mơđah tơbleăng ngê̆ thuật ‘’Pơlê xiâm – Kuăn mơngế Tây Nguyên - Kơpong peăng Tơdế Tơnêi têa’’; Tơdroăng mơđah tơbleăng ngê̆ thuât vâi krâ nah ƀă mơđah tơbleăng ếo pơtâk tiô khôi vâi krâ nah – ‘’Ki lĕm Tơmeăm ki kơnía khôi túa lĕm tro pá Hdroh Tây Nguyên.

Tiô jâ Nguyễn Thị Bích Ngọc, Kăn phŏ pơkuâ ‘na mơhno khôi túa lĕm tro, Tơ’noăng ivá ƀă Ôm hyô kong pơlê Lâm Đồng, Măng tĭng leh kơnía Ôm hyô hơnăm kố cho tơdroăng ki tơdjêp tơtro dêi hên tơdroăng pêi pro mơhno khôi túa lĕm tro, tơ’noăng ivá, mơjiâng tơmeăm ôm hyô nếo kum ăm tơdroăng lăm ngăn dêi tơmối ôm hyô tung tơnêi têa ƀă kong têa ki ê.