Kơxo lơ 3/5, Leh chuâ hlá cơ SEA Games 32 tơkŭm po a Kơpong tơrŭm tơ’noăng ivá kong têa Kul cho a tíu Modorok Techo. Rêm khu pơtroh 32 ngế veăng leh, kơxô̆ vâ pơtó ăm SEA Games 32. Tiô pơkâ apoăng, roh leh tơkŭm po hâi lơ 4/5, laga tơnêi têa tơkŭm po hiăng rĕng troh, mê khu tơ’noăng ivá Việt Nam tá hâi troh tŭm.

Khu tơ’noăng ivá Việt Nam veăng a SEA Games 32 ƀă 1003 ngế tung khu, tung mê, ai môi ngế kăn pơkuâ ƀă péa ngế kăn phŏ. Khu Việt Nam veăng 31 môn, 446 tơdroăng xiâm tơ’noăng, châ pơkâ ‘măn sap ing 90 – 120 Mê dái mêa a SEA Games 32. Mâu hơnăm hiăng hluâ, klêi kơ’nâi châ tơdah hnoăng tơkŭm po SEA Games, kong têa pú hmâ hiăng tơpui ƀă Vi ƀan Olympic nếo châ tơkŭm po xuân ai tơdroăng tŏng kum ing kong têa Malaysia.

Pakĭng mê, peăng Khu tơkŭm po kong têa ki tơkŭm po xuân tơpui ƀă hên khu tơ’noăng ivá châu Á vâ hriâm túa ki rơkê tung tơkŭm po.