Hơnăm kố, leh tơbleăng dó inâi ‘’Čư A Mung tíu tơkŭm, trâm mâ tơpui tơno ƀă mơnhông mơdêk khôi túa lĕm mâu hdroâng kuăn ngo’’, tơkŭm po tung 3 hâi, sap ing hâi lơ 4 troh lơ 6/4. Leh tơbleăng kong prâi bâ eăng lĕm a Čư A Mung apoăng xua vâi krâ kuăn pơlê mơngế Nùng rêh ối a kố tơkŭm po. Klêi kơ’nâi rêm hơnăm, leh tơbleăng kố châ pơtối po troh lâp lu, mơhnhôk kơdrâm vâi krâ kuăn pơlê mâu hdroâng kuăn ngo peăng Kơnhŏng rêh ối tung kơpong veăng pêi pro, cho mơhno khôi túa lĕm tro dêi vâi krâ mơngế Jarai a Tây Nguyên.

Troh ƀă leh tơbleăng kong prâi bâ eăng lĕm roh má 7 kố, tơmối châ ngăn tơmeăm mơhno khôi túa lĕm tro ki krip ro má môi dêi mâu hdroâng kuăn ngo kơpong kong ngo peăng Kơnhŏng, rơtế a mê cho leh tơbleăng trâm mâ mơhno khôi túa lĕm, mơđah hơdruê xuăng tiô khôi túa dêi kơong Tây Nguyên.