Kơmăng hnah, lơ 21/4, a Plông kân Hùng Vương, pơlê kong kơdrâm Việt Trì, kong pơlê Phú Thọ tơrŭm ƀă Khu xiâm pơkuâ ‘na mơhno túa lĕm tro, Tơ’noăng ivá ƀă Ôm hyô tơkŭm pơxiâm po Leh hô̆i Đền Hùng – Măng tĭng Khôi túa lĕm – Ôm hyô Đất Tổ hơnăm 2023; Tơ’noăng lâp tơnêi têa tơmeăm mơhno khôi túa lĕm ‘na hiâm mơno châ UNESCO chêh inâi ƀă Leh tơbâ 20 hơnăm pêi pro tơkêa 2003 dêi UNESCO’’.

Xông tơpui a leh pơxiâm po, pôa Trần Hồng Hà tối nhên, rak, mơjiâng, ƀă mơnhông mơdêk ki kơnâ khôi túa lĕm hdroâng mơngế cho tơdroăng ki kal, môi tiah Pôa Nguyễn Phú Trọng, Kăn xiâm pơkuâ hnê ngăn Đảng hiăng tối rơdêi tơdroăng pơtâng hnê tối dêi mâu krâ rơxông hdrối a Hneăng hôp khôi túa lĕm lâp tơnêi têa hơnăm 2021; ‘’Khôi túa lĕm tro mê dêi hdroâng mơngế ối’’.

Ƀă 15 tơmeăm ki kơnía ‘na hiâm mơno hiăng châ UNESCO chêh inâi, Việt Nam cho môi tung mâu kong têa hên tơmeăm mơhno khôi túa lĕm pơlê pơla má môi tung lâp plâi tơnêi. Klêi kơ’nâi pơxiâm po tơdroăng nghê̆ thuât ƀă dó inâi ‘’Krih tơviah xiâm kối – Đất Tổ Hùng Vương’’. Tơdroăng ai 3 tơdroăng: Krih tơviah xiâm kối - Đất Tổ Hùng Vương, ki lĕm tơmeăm kơnía ƀă Pói vâ Lạc Hồng.