Kơxo lơ 25/4, Khu pơkuâ kơphế Ƀuôn Ma Thuột tơkŭm po pơxiâm po roh mơgêi roh tơ’noăng kơphế ki xú hŏm Việt Nam hơnăm 2023. Kố cho hơnăm má 5 roh tơ’noăng kơphế ki xú hŏm Việt Nam châ tơkŭm po. Veăng tơ’noăng kơphế ki xú hŏm má môi Việt Nam hơnăm kố ai 47 tíu cheăng dêi 7 kong pơlê ƀă 84 kơphế veăng tơ’noăng, tâi tâng kơphế cho 157 tâ̆n.

A roh mơgêi, Khu châm điêm hiăng rah xo 46 kơphế ki ối má môi, má péa, má pái xuân môi tiah rah xo top 10 kơphế ki xú hŏm hơnăm 2023. Pôa Trịnh Đức Minh, Kăn hnê ngăn Khu pơkuâ kơphế Ƀuôn Ma Thuột, kăn pơkuâ khu tơkŭm po roh tơ’noăng tối ăm ‘nâi: roh mơgêi tơkŭm po sap ing hâi lơ 25 – 28/4/2023. Pakĭng mâu tơdroăng xiâm tơ’noăng mê ối ai mâu tơdroăng mơđah tơbleăng, pêi tơdroăng ‘na kơphế ki xú hŏm; mơđah tơbleăng tơmeăm, kơmăi kơmok, kơxop mơ-éa, tơmeăm kơvâ kơphế; mơđah tơbleăng hơ’lâk; tơdroăng xah hêi ai tơmeăm mơhá.

Ki rơhêng vâ tối, klêi kơ’nâi roh tơ’noăng khu tơkŭm po kô pêi pro há yă tơmeăm kơphế ki xú hŏm má môi vâ tơxâng tơdroăng kal vâ tê ƀă thăm tâk ki kơnâ ăm kơphế ki xŭ hŏm dêi Việt Nam.