Kơxo hâi lơ 21/4, kong pơlê Dak Lak tơkŭm po hâi Hlá mơ-éa ƀă túa lĕm tro pơchuât hlá mơ-eá Việt Nam rôh má 2, hơnăm 2023. Pơxá “Hlá mơ-éa: Hlê plĕng - pơ’lêh nếo - Hriăn ki nếo’’, Hâi hlá mơ-éa ƀă túa lĕm tro pơchuât hlá mơ-éa hơnăm 2023 tung kong pơlê Dak Lak po sap hâi lơ 15/4 troh tâi lơ 1/5 troh ƀă hên tơdroăng pêi pro mê cho: Tơbleăng hlá mơ-éa tiô pơxá: tơpui tơno, tơbleăng hlá mơ-éa; veăng tơlo hlá mơ-éa ƀă mâu tơmeăm pơchuât ăm vâi hdrêng kơtiê; ăm hlá mơ-éa ƀă kơtuh hlá mơ-éa ăm mâu hngêi trung hriâm, mê cho hngêi ‘măn rak hlá mơ-éa a mâu cheăm hngế hngo; tơkŭm Hâi leh ngăn hlá mơ-éa, hâi leh pơchuât hlá mơ-éa tê kơtê a mâu pơlê cheăm.

Ing mê, tơbleăng ‘na kơpong tơnêi, kuăn mơngế Dak Lak; tơbleăng tơmeăm khoăng ai hlâu, ki rơdêi ƀă tơdroăng ton nah túa lĕm tro Tây Nguyên, pơ-eăng mơnhông túa lĕm tro pơchuât hlá mơ-eá. Tơdrêng amê, ối ai tơdroăng tơbleăng um, um xup, um kơchuâ, tơmeăm STEM, vâi hdrêng kơchuâ um; xah cờ pơtáu; tíu xah hêi mơnúa kơchuâ chêh pro um.