Kơxo lơ 8/3, Tíu ‘măn rak kế tơmeăm ton nah kong pơlê Dak Lak tơkŭm po mơđah tơbleăng ‘na ếo pơtâk mâu hdroâng kuăn ngo a Dak Lak” ƀă mơđah tơbleăng tơdroăng cheăng ki hơ’lêh kơxô̆ a tíu ‘măn rak kế tơmeăm. Po sap ing nôkố troh tâi khế 4 la ngiâ, inâi “ếo pơtâk mâu hdroâng kuăn ngo a Dak Lak” ai 175 kế tơmeăm ƀă um, ếo pơtâk dêi 48 hdroâng kuăn ngo dế rêh ối a Dak Lak.

Mâu kế tơmeăm kố châ mơđah tơbleăng chiâng 8 inâi môi tiah ƀă 8 nâl tơpui, tơbleăng ki lĕm ‘na mơhno khôi túa lĕm tro, tơdroăng rêh ối dêi mâu hdroâng kuăn ngo ing mâu ếo pơtâk khôi hmâ, kế tơmeăm xúa rêm hâi dêi vâi. Rơtế a mê, a tíu ki mơđah tơbleăng ối ai mâu tơdroăng ki châ mơnúa ngăn môi tiah: tĕn ếo pơtâk kuăn ngo, tơbleăng mâu kế tơmeăm ki kơnía git dêi Dak Lak, pế pơchên ƀă kâ mâu kế kâ dêi hdroâng Rơđế.

Drêng kố, Tíu ‘măn rak kế tơmeăm Dak Lak xuân tơbleăng tơdroăng cheăng hơ’lêh kơxô̆ châ tơbleăng a tíu pêi cheăng môi tiah: po mơhno ƀă ăm kơmăi ki tơpui tơbleăng ki chiâng po xêh vâ kum tơmối lăm hyô ngăn a rôh mơđah tơbleăng kố; hnê mơhno tơmối xúa App lăm ngăn a mâu kế tơmeăm điê̆n tưh ki rơkê; tiê tơpui ƀă mâu kế tơmeăm ƀă kơmăi kơmok 3D; châ mơnúa ngăn mâu tơdroăng cheăng mâu kế tơmeăm ki ôh tá ai khât.