Kơxo lơ 17/4, a pơlê kong kơdrâm Đà Lạt, kong pơlê Lâm Đồng, Tíu ‘măn rak kế tơmeăm ton nah Khu lêng Việt Nam hiăng po tơdroăng kơchuâ um ‘na inâi Khu lêng kring vế tơniăn – Tơplâ kăch măng hơnăm 2023”. Veăng tung tơdroăng kơchuâ kố ai 16 ngế kơchuâ, cho hô̆i viên Hội Mỹ thuật Việt Nam. Ki xiâm dêi tơdroăng kơchuâ kố cho tơkŭm tối tơbleăng ‘na hiâm mơno pâ nhuô̆m tơnêi têa, hiâm mơno khŏm mơ-eăm rak vế tơniăn krê hnoăng pơkuâ, tâi tâng tơnêi tơníu dêi Tơnêi têa; tối tơbleăng mâu tơdroăng cheăng dêi Mố đô̆i tung tơdroăng nếo a tâi tâng mâu kơvâ cheăng ƀă hên ki ê.

Tiô Đăi tă Đinh Xuân Hòa, Kăn phŏ pơkuâ Tíu ‘măn rak kế tơmeăm Ton nah Khu lêng Việt Nam, kố cho tơdroăng cheăng pêi pro ai pơxúa khât, veăng kum hnê tối mâu tơdroăng veăng kum dêi tâi tâng Đảng, tâi tâng kuăn pơlê, tâi tâng khu lêng pin tung tơdroăng cheăng mơjiâng ƀă mơnhông tơnêi têa, mơjiâng Khu lêng krá rơdêi ‘na tơdroăng kal kí. A rôh po kơchuâ tiô tối hdrối kô ton troh tâi hâi lơ 28/4 la ngiâ.