Klêi hên rôh chêh, ‘mâi rơnêu, chêh tơ’nôm, hâi lơ 4/4, a pơlê kong kơdrâm Kon Tum, Khu hnê mơhnhôk cheăng kong pơlê Kon Tum tơkŭm po Hôp tơpui tơno veăng hnê tối tung hla mơ-éa ‘’ Chêh mâu tơdroăng kal dêi rôh hôp kân kong pơlê Kon Tum pơla hơnăm 1471- 2021”  vâ chêh in tơbleăng. Hlá mơ-éa chêh rôh má 2 kơxâp hlá mơ-éa ‘’ Rah chêh mâu tơdroăng kal mâu rôh hôp kân dêi kong pơlê Kon Tum pơla hơnăm 1471- 2021”  ki hbo gá lối 700  kơtâ.

Hlá mơ-éa mê hdró hâi khế hơnăm xâp hơnăm 1471 pơxiâm tơdroăng kal Hngêi Lê hdró tíu tơkăng kong rak ngăn kơpong  Cao Nguyên. Tơdroăng kal tung kơxâp hlá mơ-éa ai 3 tơdroăng ki kal cho mâu tơdroăng leh kân dêi kong pơlê  Kon Tum klâ pro 3 hneăng.  

Ƀă púi vâ kơxâp hlá mơ-éa  Rah chêh mâu tơdroăng kal  ing ton nah dêi kong pơlê Kon Tum pơla hơnăm  1471- 2021 cho môi um hdró tâi tâng, ki mơhno nhên ăm ‘nâi tung tơdroăng mơjiâng ƀă mơnhông mơdêk kong pơlê Kon Tum, Khu rah chêh kơxâp hlá mơ-éa nhoăm tơmâng tơdroăng veăng hnê khê̆n ki tơxâng vâ chêh ‘mot tơ’nôm tung hlá mơ-éa ăm ai hên tơdroăng kal, tơdroăng hôp kâ ki hdró tơ ƀrê dêi kong pơlê, dêi kơvâ cheăng, dêi mâu rơxông hdrối nah ƀă hên ki ê. .. Ing mê mâu tơdroăng kal ki veăng hnê tối, Khu rah chêh kơxâp hlá mơ-éa hiăng ‘mâi chêh nếo, ‘mâi rơnêu, tơ’nôm vâ drêng in tơbleăng ăm mơngế pơchuât ngăn châ ‘nâi hên tơdroăng ki ‘lo tro  xuân hlo ‘nâi tâi tâng mâu tơdroăng dêi kơpong tơnêi, kuăn mơngế, túa lĕm tro, tơdroăng ton nah dêi Kong pơlê Kon Tum.