A Kŏng ti pêi cheăng tiô rơnó ‘No liăn cheăng mơjiâng pro tíu ối Thái Bình (tíu pêi cheăng a Quy Nhơn) tíu pêi cheăng ăm xúa vâ chê 30 toăng rơxế điê̆n ôm hyô a Quy Nhơn, cheăng séa ngăn, ‘mêng rơnêu châ tơbleăng pêi tơdâng tơ’mô. Pôa Hồ Thanh Khiết, Kăn pơkuâ tíu pêi cheăng kố ăm ‘nâi, tâi tâng mâu rơxế pơrá hiăng châ séa ngăn nhên vâ rĕng hlo, ‘mêng rơnêu mâu rơxế ki tơ’nhiê, vâ rak tơniăn hdrối vâ ăm tơmối kơto.

“Kŏng ti hiăng pro 1 khu ki ‘mêng rơnêu krê pơla peăng khu rơnêu ƀă tâi tâng mâu nhŏng o. Drêng rơxế tơ’nhiê ki klâi ‘lo mê tơbleăng hlối vâ kŏng ti tối ăm peăng khu rơnêu vâ ‘mêng tung hâi ki mê. Tâng rơnêu ôh tá chiâng mê ăm rơxế mê pơtê ƀă pơtroh rơxế ki ê ăm tơmối kơto. Ki tơniăn dêi rơxế mê đi đo châ séa ngăn pul on, kơhăm rơxế cho péa tơdroăng ki kal má môi tung tơniăn dêi rơxế”.

A mâu tíu pêi cheăng pơto chơ ki kân tơdroăng pêi pro túa séa ngăn kih thuât rơxế điê̆n xuân châ pêi pro kơtăng. Pôa Lê Hùng Thịnh, Phŏ pơkuâ tíu pêi cheăng dêi Kŏng ti Tơlo liăn Sun Taxi a Bình Định ăm ‘nâi, tơdroăng ki séa ngăn rơxế châ pêi pro rêm hâi ƀă ‘mêng rơnêu rêm khế tiô pơkâ.

“Tung pơla chơ tơmối rêm hâi, drêng nhŏng o pơhlêh chôu pêi cheăng, tơdah xo rơxế mê pơrá châ peăng khu kih thuât a tíu cheăng, khu ki pơkuâ séa ngăn rơxế. Ƀă tơdroăng ki rak vế ‘mêng rơnêu rêm khế mâu rơxế đi đo châ séa ngăn kơhăm, kái rơxế ƀă mâu tíu ki ê. Peăng tíu pêi cheăng đi đo gâk hâi măng vâ teăm ‘mêng rơnêu tâng lơ ai mâu tơdroăng ki rơxế tro tơ’nhiê vâ rak tơniăn ăm mâu rơxế”.

Ƀă mâu khu ki vê rơxế, tơdroăng ki rak vế tơniăn ăm tơmối đi đo cho tơdroăng ki châ kơjo xiâm. Ngoh Phan Tấn Duy, môi ngế vê rơxế điê̆n ôm hyô tối, hdrối vâ lo ing tíu, ngế ki vê rơxế athế séa ngăn tâi tâng mâu kih thuât ƀă pơchân tơmối pêi pro kơtăng pơkâ tơniăn. Ngoh Phan Tấn Duy ăm ‘nâi:

“Hdrối vâ ‘no rơxế mê ngế ki vê athế séa ngăn tâi tâng mâu pul on, chêng rơxế, kơtôu rơxế; tâng hlo tơniăn mê nếo ăm rơxế chơ tơmối. Tung pơla chơ mê đi đo pơchân tơmối krâ kơxái rak tơniăn, ‘nân tơniăn lĕm a rơxế xuân môi tiah pôi tá chơ hên ngế luâ râ vâ rak tơniăn a troăng cho tơdroăng ki kal má môi”.

Nôkố, a kong pơlê Gia Lai ai 3 khu mơdró kâ ‘na chơ tơmối ƀă rơxế điê̆n ƀă tâi tâng toăng rơxế cho 119 toăng. Klêi kơ’nâi séa ngăn dêi kơ koan ki ai tơdjâk, mâu khu mơdró kâ pơrá châ hbru ăm hhlá mơ-éa phêp pêi cheăng ƀă rơxế mê athế pêi pro tiô tơdroăng pơkâ thế ‘na tơniăn kih thuât. Tơdroăng ki séa ngăn, ‘mêng rơnêu rơxế ôh ti xê veăng gum rak vế tơniăn ăm tơmối mê ối mơdêk ki rơkê plĕng tung tơdroăng cheăng, pro chiâng um méa ki hmâ achê, rơkê ƀă tơmối ôm hyô a kơphô̆ têa kơxĭ Quy Nhơn tung pơla ôm hyô hiăng vâ troh la ngiâ.