Tĭng rơkâu kong mêi dêi mơngế M’Nông hmâ po drêng vâi krâ-nhŏng o hbrâ vâ chối dêi báu la kong prâi xuân ối tô mơdrăng khăng khoăng, vâ khoh ai mêi tro tô ‘ló; troh rơnó xuâ báu, đôu alâi châ hên ôh tá tro kong tô mơdrăng, khăng khoăng, kuăn pơlê châ ai tơdroăng rêh ối tơniăn lĕm. Pôa Bơ̆ Khiêm, ối a pơlê U3, cheăm Tâm Thắng, pơlê kân Ea Tling, tơring Čư̆ Jut, kong pơlê Dak Nông tối ăm ‘nâi:     

“Tĭng rơkâu kong mêi hmâ tơkŭm po a khế 4, klêi kơ’nâi ai kong mêi apoăng  rơnó, khế 5 mê kô pơxiâm chối báu pêt alâi, krâ pơlê kô rơkâu xối xeăng, krếo thế mâu xeăng bro a kơno têa, akố kuăn pơlê kô hbrâ tŭm têk mâu hdrê, môi tiah kloăng plôi, tơ-uâ, kloăng trŏng, phó, alâi ƀă hên mâu hdrê ki ê hía klêi kơ’nâi rơkâu xối vâi krâ kô lo lăm a chiâk deăng vâ chối báu, pêt prá, alâi, plâi,pôm”.

Hdrối vâ tơkŭm po tĭng rơkâu kong mêi, krâ pơlê krếo thế tâi tâng pơlê tơkŭm vâ tơno tơnêng túa pêi pro, tăng rah tíu ki vâ rơkâu kong mêi, klêi mê, hbrâ mâu tơmeăm hdroăng vâ pleăng ăm khu xeăng, ƀă mâu kế tơmeăm vâ veăng kum ai tơdroăng pơro dêi tơchuôm pơlê. Rêm hnoăng cheăng ki hbrâ rơnáu ahdrối pơrá châ krâ pơlê xing xoăng hnoăng cheăng i nhên troh tơrêm ngế tung pơlê. Túa  rơkâu xối mê châ tơkŭm pro tung 2 hâi, môi hâi hbrâ kuăn mơngế, tơmeăm khoăng ƀă môi hâi kô tơkŭm po tĭng rơkâu xối xeăng.

Pôa Y Sê, mơngế M’Nông, krâ pơlê a cheăm Dak Sak, tơring Dak Mil, kong pơlê Dak Nông tối ăm ‘nâi:

“Kố cho tĭng ki pro kân krip dêi tâi pơlê pơla, ahdrối vâ tơkŭm po mơdĭng kố, krâ pơlê kô tơkŭm tŭm tâi tâng vâi krâ-nhŏng o tung pơlê tơno tơnêng vâ rah hâi ki rơkâu xối, mâu rơpŏng kô tơlo to lâi, hngêi rơpŏng ki lâi tơlo í, rơpŏng ki lâi djâ phái, ai báu djâ dêi báu, ai drôu xiâm djâ drôu xiâm vâ dêi rơpó ôu kâ klêi kơ'nâi rơkâu xối xeăng”.

Troh nôkố, hâi tĭng ki mê pơtối châ rak vế, ing xo má mâu rơpŏng hiăng djâ dêi tơmeăm khoăng hdroăng, môi tiah í, drôu, phái ƀă hên hĕng mâu tơmeăm ki ê, tâi tâng vâi kô tơkŭm a hngêi krâ pơlê vâ hbrâ mâu tơmeăm djâ troh a kơno têa vâ rơkâu xối. Tiô rơkong hơ’muăn tối dêi pôa Y Sê, krâ pơlê, hdrối nah, mơngế M’Nông a Dak Nông hmâ tơkŭm po rơkâu xối xeăng 1 hơnăm 1 hdroh a kơno têa dêi pơlê.

“Tĭng rơkâu xối kong mêi hmâ tơkŭm po 1 hơnăm 1 hdrôh, tâi tâng pơlê kô mĕn pro um kơpôu, ro, chu, pu pái ƀă loăng pleăng kơtôu ngiât ki ai kơpê, mâu tơmeăm ki ‘nâ xuân pro ƀă loăng vâ pơtroh ăm mâu khu xeăng, vâ pâ khu xeăng pro ăm kong mêi, tôh mâu tơmeăm pêt dêi kuăn pơlê, tĭng ki kố hmâ tơkŭm pro a kơno têa dêi pơlê, krâ pơlê môi tiah á kô teăng mâ kuăn pơlê krếo thế mâu khu xeăng vêh troh châ ngăn mâu tơdroăng rơkâu xối mê. Mâu tơmeăm hdroăng tung mê ai: í, phái, chu kŭn, drôu xiâm, mâu plôi dâ têa ƀă môi pâng klŏng phêa dâ mâu hdrê, rêm hdrê ai 7 kloăng”.

Klêi kơ’nâi hbrâ tŭm têk mâu tơmeăm hdroăng, krâ pơlê pôe mơheăm í, xo mơheăm mê tơvât ƀă drôu trêng tung môi to mŏng meăm hlái, klêi mê, rơkâu xối, ngế rơkâu xối rế râng xâk í kơdrăm tung mŏng drôu klêi mê pik a mâu tơmeăm ki rơgi bro ƀă loăng, bliu a vó drôu, mâm chu ƀă xế tâ tá kơno têa vâ rơkâu xối khu xeăng tŏng kum ăm kuăn pơlê châ ai têa xúa i hên, châ ai hên kong mêi vâ kuăn mơngế châ rêh ối niân, loăng pơlái, kong kế chiâng dâi lĕm rơbê rơbuâ, kuăn pơlê phái tơtô.

Tung pơla tơkŭm rơkâu xối xeăng, mâu ngế ki veăng pêi mê athế rak vế, pêi pro tro tiô khôi túa vêa vong dêi tơdroăng rơkâu xối, tŭm tơdroăng pêi pro, tơpui tơno pơrá athế rak luât i tơdrăng khât, pơtih tâng ai ngế ki lâi pro xôi kô tro pơlê pơxâu phăk, khu xeăng kô ôh tá vâ tơmâng, xua mê, tŭm mâu tơdroăng pêi pro, rơkâu xối khu xeăng kô ôh tá vâ tơmâng, ôh tá vâ tŏng kum kuăn pơlê.

Mơgêi tĭng rơkâu xối a kơno têa rêm ngế kô tơkŭm troh a hngêi krâ pơlê vâ mơgêi tơdroăng rơkâu xối kong mêi. Mơheăm í mê âi kô pơtối châ pik a mâu pơtâ, ní, pik a tơmeăm khoăng, chêng, koăng, vó ƀă mâu tơmeăm ki ê. Klêi mê, rêm ngế rơtế ôu drôu xiâm, tŏn chêng koăng, rơngê ting ting, hơniâp ro, tơrŭm tơrôa ƀă pói tơngah a rơnó la ngiâ kố châ hên báu phái, prá alâi, pôm, plâi, kô ai tơdroăng mơhúa, lĕm ro, kro niân.