Tung pơla ai idrâp dêi tơdrá prôa hơniâp ro, 6 ngế vâi droh hdroâng Mông xâp rơnuâ dêi êó pơtâk kơhnhon xuăng tiô tơdrá Sênh Tiền. Nâ Ma Thị Huế, ôí a cheăm Čư̆ Kroah, tơring MDrăk ai tối tiah kố: Sênh Tiền cho môi tung mâu túa kơhnhon xuăng chal vâi krâ roh nah dêi mơngế Mông, hmâ mơđah tung mâu roh leh, têt lơ hâi ki po mơdĭng ro. Maluâ ti mê, a pơlê nếo a kong pơlê Dak Lak, túa kơhnhon xuăng kố preăng hlo vâi kơdrâi, vâi droh mơđah.

Tơkôm la lâi troh hâi po mơdĭng, hâi leh, mê vâi droh rơtăm ai rơngê, ting ting, rêi prôa, hlŭm rơvŏng mê mâu vâi nâ o nếo tơkŭm ƀă hlê plĕng hên tâ ‘na túa ki kơhnhon xuăng ki lĕm ro kố.

“Khu ngin vâi o kố ai 6 ngế, hriâm tâp châ 1 khế mê nếo chiâng kơhnhon xuăng tiah nokố. Dế nôkố tơkŭm rêi prôa, hlŭm rơvŏng. Á hlo ‘ló hâk tơngăm ‘nâng, drêng hriâm ƀai kơhnhon xuăng kố á ‘nâi hdroâng kuăn ngo pin ga ai hên túa ki lĕm tro. Pin ‘nâi khôi tuá, vêa vong hdroâng kuăn ngo tơná xuân chía rế hên, pin tá hâi teăm hlê klê plĕng tŭm to lâi ôh”.

Ƀă o H’Chuyên Knul, a ƀuôn Mblơt, cheăm Ea Ƀông, tơring Krông Ana, roh tơ’noăng cho roh ki hâk tơngăm ƀă tơdrá chêng ki ro rih krê xêh dêi mơngế Rơđế Bih. O H’Chuyên ai tối tiah kố, ing rơnó pơtê hriâm hơnăm nah, á o hriâm tŏn chêng Jhô. Kơnôm ing tơdroăng hnê djâ dêi mâu vâi krâ ki rơkê, á ‘nâi bu ai hdroâng mơngế Rơđế Bih tê ki ai kơtum chêng Jhô ăm vâi kơdrâi i tŏn.

“Á tâ hlo mơjo pâ dêi khôi túa, vêa vong hdroâng kuăn ngo tơná hên tâ. Ƀă á o rơhêng vâ mơhno mơđah khôi túa lĕm tro mê troh a tơrêm ngế”.

Khu vâi droh rơtăm rơngê ting ting ƀă rêi prôa, hlŭm rơvŏng dêi khôi túa hdroâng kuăn ngo cho môi tung mâu tơdroăng cheăng ki pơkâ Hneăng hôp Hâi mơdĭng á mơjo pâ Tơnêi têa xua Khu pơkuâ ngăn Đoân Droh rơtăm kong pơlê Dak Lak tơkŭm po. Ai vâ chê 30 tơdroăng rơngê ting ting, rêi prôa, 300 ngế mơđah cho mâu vâi droh rơtăm, đoân viên ƀă vâi o phô̆m vâ xông kân dêi 15 tơring, pơlê kong krâm, pơlê kong kơdrâm tung kong pơlê hiăng mơđah hên mâu tơdrá rơngê ting ting, túa kơhnhon xuăng tiô khôi hmâ, ƀai mơđah dêi mâu hdroâng kuăn ngo a hên kơpong tơnêi tíu tung lâp tơnêi têa.

Ing mâu tơdrá prôa, rơ-rêk ki hmâ tâng dêi kơtum chêng Jhô, chêng hlái, chêng kơlá, prôa không, khiê̆n đing năm tá troh a prôa tĭnh, rơvŏng mèo, mâu tơdrá eirei, hơdruê then, hơdruê lý, ví dặm, hơdruê Peăng Hdroh ƀă hên hĕng mâu tơdrá hơdruê ki ê hía hiăng mơjiâng chiâng roh hơdruê xuăng ki hơniâp ro, lĕm krip. Nâ H’Tuyết Niê, ối a ƀuôn Čuôr Dăng A, cheăm Čuôr Dăng, tơring Čư̆ Mgar tối tiah kố:

“Tung mâu roh tơ’noăng rơngê, ting ting, rêi prôa tiah kố, mơjiâng chiâng hên roh ki tơ’lêi kum ăm mâu vâi pú châ hriâm tơ’nôm ing mâu khu, mâu pú ki ê. Ƀă ing mê, xuân kum tơná pin ai tơ’nôm hên tơdroăng ki hlê plĕng vâ hriâm tâp, ai tơdroăng ki pói rơhêng vâ ‘na hriâm tŏn chêng koăng, hriâm tŏn, rêi mâu prôa ki ê, hlê plĕng tơ’nôm ‘na khôi túa, vêa vong hdroâng kuăn ngo dêi tơná”.

Tiô tơdroăng ki séa mơnhên ngăn dêi Khu châm điêm, hneăng tơ’noăng kố hiăng mơhno tối tơdroăng ki hên khôi túa dêi mâu hdroâng kuăn ngo ki dế rêh ối a kong pơlê Dak Lak. Rêm tơdroăng hơdruê xuăng mê pơrá ai tơdroăng ki hbrâ rơnáu ahdrối ‘na tơdroăng rah xo tơdroăng rơngê ting ting, ếo pơtâk, kơpĕn ƀă túa ki hnê mơđah, rêi prôa ƀă hên hĕng mâu tơdroăng ki ê.

Tơdrêng amê, pơtối rak vế mâu tơdroăng ki hiăng rơkê a hneăng hdrối nah, mơhno tối nhên tơdroăng ki ai mâ dêi mâu vâi o phô̆m vâ xông kân tung hên tơdroăng rơngê ting ting. Pôa Lê Văn Hồng, Hngêi trung Cao đẳng Văn hoá Nghệ thuật kong pơlê Dak Lak, Kăn pơkuâ ngăn khu châm điêm tối ăm ‘nâi:

“Khu châm điêm hơnăm kố hiăng hlo tơdroăng ki kơdo mơ-eăm dêi khu ki veăng mơđah akố, ki rơhêng vâ tối, ‘na tơdroăng ki tơ’noăng rêi prôa, tŏn chêng koăng, hiăng mơhno tơdroăng ki lĕm ro păng ‘nâng. Klêi mê nêó, mâu vâi o phô̆m vâ xông kân dêi mâu tơring kơpong hơngế hơngo môi tiah Krông Bông, Lăk. Mâu vâi o maluâ hơnăm ôí tơxĭn la hiăng plong mot tung hiâm mơno mâu tơdrá rơngê, ting ting ƀă mâu idrâp chêng koăng, kơhnhon xuăng, mơhno tối tơdroăng ki ƀlêi chiâng ăm hâi mơdĭng mê”.

Ki ƀlêi chiâng dêi roh tơ’noăng mê hiăng veăng kum mơhnhôk ƀă mơhno tơbleăng tung đoân viên droh rơtăm, khu vâi o phô̆m vâ xông kân dêi kong pơlê Dak Lak hâk git ƀă tơdrá rơngê ting ting, tơdrá prôa, rơvŏng hlŭm vâ pơtối rak vế, mơdêk khôi túa lĕm tro dêi hdroâng kuăn ngo tơná.