66 kơtâ um a tíu mơđah tơbleăng ai hên mơngiơk pơrá phá, rêm kơtâ um cho mâu tơdroăng hơ’muăn ‘na mâu lêng mố đô̆i kuăn pơlê, kŏng an kuăn pơlê  tung tơdroăng mơnhông mơdêk tơnêi têa. Um “Trường Sơn Đông” kơchuâ mâu lêng lăm tơplâ Trường Sơn ton nah, um mâu lêng khên tơnôu, rơdêi tơplâ la ôh tá xâu răng ƀom, hlâ mơngế; um kơchuâ “Rơkong hnê pơchân”, tối tơdroăng tơbâ ton nah dêi Kăn xiâm hnê ngăn tơnêi têa hneăng hdrối Hồ Chí Minh lăm pôu ƀă hlối pơchân mâu kăn ƀô̆ lêng kơnŏng dêi lêng hbrâ rơnáu mâu tơdroăng tơplâ.

Um “Vâi pú mố đô̆i” ‘na um mâu lêng mố đô̆i ƀă Kăn sát kring gak têa kơxĭ tung rơxông tơnêi têa hơniâp lĕm, tơkŭm, pêi tro hnoăng cheăng veăng kum, kring vế mâu kuăn pơlê ki dế rơnăng ká a têa kơxĭ. Ƀă vâ chê 40 hơnăm tơdroăng cheăng tung mâu lêng, tung mê ai 30 hơnăm pêi cheăng a Khu lêng pĕng kơnŏng dêi lêng tơƀai, um kơchuâ xup xo mâu lêng mố đô̆i cho ki xiâm mơhno tơdroăng tơvâ tơvân dêi mâu ngế ki kơchuâ um mê cho Đào Hoa Vinh. Pôa tối ‘na ki pơxúa dêi um kơchuâ “Rơkong hnê pơchân”.

“Á hâk vâ ƀă mâu um kơchuâ chêh ‘na Pôa Hồ ƀă mâu lêng pĕng kơnŏng dêi lêng tơƀai xua tung pơla ối rêh nah, pôa hiăng ‘măn ăm hên kơ khu lêng pĕng  kơnŏng, 11 hdroh lăm pôu, troh a  đông lăm pôu ngăn mâu kăn ƀô̆, mâu mố đô̆i  a mâu hơnăm tơplâ xâ Mih. Pakĭng lăm pôu kơ-êng hơlêm, mơhnhôk mơ-eăm, tơdroăng rêh ối dêi kăn ƀô̆, mâu lêng mố đô̆i, mâu rơkong pôa hnê pơchân cho troăng ki mơhno thế pêi pro dêi mâu lêng pĕng kơnŏng, ôh tá to xê to tung tơplâ, ôh tá xê tung pơla mâu khế hơnăm tơplâ mê tá tung pơla tơnêi têa hơniâp lĕm, mơjiâng ƀă kring vế Tơnêi têa, mâu rơkong hnê pơchân dêi Pôa xuân ối pơxúa ƀă tá mâu lêng mố đô̆i tối tơdjuôm, khu lêng pĕng kơnŏng tối krê xuân đi đo chôu pâ tung tuăn mơno rơkong Pôa hnê ƀă ngăn mê cho tơdroăng pơkâ pêi vâ mơ-eăm hriâm pât tơná tung tơdroăng pêi cheăng mơjiâng ƀă kring vế Tơnêi têa nôkố’’.

Mơđah tơbleăng um veăng ai 66 ngế ki kơchuâ chêh cho mâu ngế tung Kâu lăk ƀô̆ Hriăn kơchuâ chêh ‘na um kring vế Tơnêi têa ƀă mâu ngế ki kơchuâ um a Hà Nội, Nghệ An, Thanh Hóa, Thái Bình, Phú Thọ, Hải Phòng… Tâi tâng mâu um kơchuâ chêh xuân châ hriăn tơmiât kơchuâ tung hơnăm 2023. Ki tơxâng vâ tối, pakĭng mâu um kơchuâ dêi mâu ngế ki pêi cheăng tung khu lêng, kŏng an kuăn pơlê, mơđah tơbleăng um hơnăm kố ối ai mâ ngăn ki nếo dê mâu ngế hriăn kơchuâ hơnăm ối nếo pêi cheăng kơvâ ki ê.

Khĕn kơdeăn um kơchuâ lĕm ƀă tơdroăng vâ tối tung um kơchuâ tơbleăng a tíu mơđah tơbleăng um tơmeăm “Rơtế prôk lăm pơtrui’’ hơnăm 2023, pôa Nguyễn Bằng Lâm, Ngế phŏ hnê ngăn Khu kơchuâ um Việt Nam tối tiah kố:

“Mơđah tơbleăng um rôh kố a hlo lĕm tro ‘nâng, ‘na kơxô̆ ai hên ngế pơtroh um, hên um kơchuâ ƀă malối mâu kum kơchuâ mê vâ tối ‘na kring vế Tơnêi têa, ‘na mâu lêng mố đô̆i nôkố châ tối hên tung rôh mơđah um drêng kố. Ngin hlo ti mê hâk mơnê ‘nâng cho um kơchuâ chêh ‘na mâu lêng mố đô̆i dêi kăch măng lơ mâu um kăch măng kring vế Tơnêi têa xuân ối châ hên kuăn pơlê vâ ‘nâi plĕng, tá mâu ngế ki hriăn kơchuâ hiăng luâ mâu rơxông tơplâ ƀă malối ai mâu ngế hơnăm ối nếo  tá mâu vâi o ki tá hâi lăm tơplâ tung mâu rôh tơplâ la vâi xuân hriăn kơchuâ chêh mâu um.

Kố cho tơdroăng ki ro vâ hbrâ troh tung hơnăm 2024 mơđah tơbleăng um  tung lâp  tơnêi têa kơchuâ chêh ‘na mâu lêng môi đô̆i ki tơplâ dêi kăch mặng, môi rôh trâm mâ ai hên ngế dêi khu chêh kơchuâ um ‘na mâu lêng kăch măng, hlối séa ngăn mơhá pri 5 hơnăm dêi khu xiâm pơkuâ ngăn lêng gak tơkăng kong hơnăm 2025’’.

Ki hlo tơviah rĕng chôu pâ tâ ƀă tơdroăng pêi pro ƀă tơdroăng mơhno hên túa ‘na um kơchuâ mâu lêng kuăn pơlê, kŏng an kuăn pơlê tung mâu rôh tơplâ ƀă tung tơdroăng rêh ối nôkố, nâ Nguyễn Mai Anh, pêi cheăng a Pơlê kong kân Hồ Chí Minh tâ môi tiah kố:

“Mâu ngế kơchuâ um hiăng kơchuâ tiô tuăn tơmiât vâ tối ‘na tơdroăng ki lâi hía ing mâu mơngiơk pik, um kơchuâ, troăng chêh kơchuâ ai tíu tơdah ai tíu ôh, ai um ki ‘nâ mơngiơk hleăng la ngăn xuân hlo um ƀă tơdroăng vâ tối ‘na um mê, mơhno tuăn pâ ƀă mâu lêng ƀă mơngế kuăn pơlê kring gak Tơnêi têa’’.

Tâng kơxô̆ mơngế kơchuâ chêh um ki mơđah a tíu mơđah tơbleăng hdrối nah ôh tá hên, mê rôh mơđah tơbleăng um “Rơtế lăm pơtrui’’ hơnăm kố, mâu ngế ki chêh inâi vâ kơchuâ chêh um mê ôh tá xê hên ‘na kơxô̆ mơngế, mê mâu um kơchuâ hlối hên mơngiơk hên tơdroăng ki vâ tối.

Kố cho rôh pơxiâm vâ mâu ngế rơkê kơchuâ um pơtối tơkŭm hriăn kơchuâ ‘na hên tơdroăng dêi mâu lêng, ƀă mâu lêng ki lăm tơplâ dêi kăch măng, pêi pro mâu tơdroăng vâ troh leh tơbâ 80 hơnăm Hâi mơjiâng Khu lêng kuăn pơlê Việt Nam tung hơnăm la ngiâ.