Tơdroăng ki ai mâ veăng po mơđah, tơbleăng tơdroăng, tơmeăm khoăng dêi Rơ’jíu xiâm Việt Nam a tiú ki mơđah Hneăng tơbleăng hlá tơbeăng lâp tơnêi têa hơnăm 2023 dó inâi păng ‘nâng, tŭm têk, tơdrăng: “Hên troăng mơ’no-Hên hơkong tơpui-Cheăng ki rơkê păng ‘nâng-Tro tiô chal nếo” hiăng tơ’mot hên kuăn pơlê, tơmối rơhêng vâ troh pôu ngăn. Hên mâu tơmối, nhŏng o lăm troh ngăn tíu ki tơbleăng mơđah dêi Rơ’jíu xiâm Việt Nam vâ xup um tơbâ vế ƀă logo VOV ki hiăng hmâ ƀă châ hmâng mâu tơdroăng nếo ai, châ ngăn mâu um méa, tơdroăng ki xông tơtêk dêi Rơ’jíu.

Rơ’jíu xiâm Việt Nam cho kơ koan hlá tơbeăng ki ai hên troăng hơlâ mơ’no, tung mê ai tá rơ’jiú, um tơvi, ai tá hlá tơbeăng hlá mơ-eá, hlá tơbeăng điê̆n tưh, ƀă ai hên khu ngế chêh hlá tơbeăng, kih thuât tâi tâng vâ chê 2 rơpâu 700 ngế. Xua ai hên hơkong tơpui, tung mê ai 13 nâl kong têa ê ƀă 13 nâl hdroâng kuăn ngo, rơ’jíu đi đo tơbleăng tối, mơhno mơnhên tơdroăng chal nếo, túa lĕm tro ƀă tơdroăng ki hlê plĕng vâ tơ’mot hên khu râ rơhêng vâ hmâng, vâ ngăn.