VOV4.Sêdang - Pơla hdrối kố nah nếo po hneăng hôp mơ’no tơdrêng dêi Khu xiâm ngăn ‘na tơdroăng tiah hmâ dêi Chin phuh ƀă 27 kong pơlê, pơlê kong kơdrâm kơpong peăng Hdroh, sap ing Phú Yên troh a Cà Mau ‘na tơdroăng hbrâ, tơplâ, mơdât pơreăng COVID-19. Xông tơpui a rôh hôp, pôa Phạm Minh Chính, Ngế pro xiâm hnê ngăn tơnêi têa hiăng pơkâ thế kal pơtối mơdêk ivá ki ó rơdêi dêi tâi tâng hdroâng mơngế, tá khu xiâm pơkuâ ngăn ‘na cheăng kal kí, pơlê pơla, kuăn pơlê, khu mơdró, pơlê pơla pôu râng hnoăng cheăng, veăng kum, hnê djâ dêi pó tung tơdroăng hbrâ tơplâ mơdât pơreăng.

A roh hôp mê, mâu kăn hiăng tơkŭm tơpui tơno, seá mơnhên ngăn ‘na tơdroăng tâ tú dêi pơreăng COVID-19 dế nôkố ƀă tối hdrối tung mâu hâi xo ah hmôi; ki hiăng chiâng pêi pro, tơdroăng ki ối ‘ro tung pơla pêi pro mâu hnoăng cheăng, maluâ tung tơdroăng pơkuâ ngăn, hnê djâ, tơkŭm rak vế, pêi pro, tơrŭm cheăng pơla mâu khu râ, kơvâ cheăng, kong pơlê, pơlê kong kân vâ tơdroăng pêi pro, hbrâ tơplâ mơdât pơreăng châ tơƀrê, tiô kơ tơdroăng ki khŏm kâi châ kring vế, rak ngăn ivá châ chăn dêi kuăn pơlê cho má môi, ki hdrối tâ, kơjo kum má 1 a mâu kong pơlê, pơlê kong kân drêng pơla kố, mê cho hbhrâ mơdât, tơplâ ƀă pơreăng COVID-19, mâu tíu ki tơniăn, mê xuân ối pơtối pêi cheăng kâ, mơnhông ‘na pêi mơjiâng tơmeăm khoăng, pêi lo liăn ngân.

Xông tối tơbleăng a roh hôp mê, pôa Nguyễn Thanh Long, Ngế xiâm ngăn ‘na pơkeăng ƀă khăm pơlât tơnêi têa pin tối ăm ‘nâi, tơdroăng ki pơreăng tâ tú tung tơnêi têa xuân ối xâu xía ó khât:

“Ki xiâm dêi tơdroăng ki xâu xía dêi pơreăng, mê ga hiăng chiâng pơreăng Delta tung lâp tơnêi têa pin, pơreăng ki kố ga xuân cho xâu rơ-iô ăm lâp plâi tơnêi. Ti lâi pin hlo roh kố ga xông tâ tú tiô kơpong, tiô roh, ai hên ngế ki tro tâ tung môi roh tiah mê. Xua ga pơreăng ki hiăng tâ tú kơ mơngế mê ga pơtối xông nếo, rĕng tâ tú troh mơngế ki ê, pơreăng ki kố tâ tú têi ó hluâ tâ pơreăng ki hdrối. Ngin xuân tối pơtâng ăm mâu khu pơkuâ ngăn kong pơlê, pơlê kong kân tơdroăng hbrâ mơdât pơreăng ôh tá xê pêi pro môi tiah roh hdrối, kal athế hbrâ rơnáu i krâu tâ, rơdêi tâ, rĕng tâ, kal athế chân tuăn ƀă pêi pro ó rơdêi tâ”.

Hneăng hôp mơ’no tơdrêng tung um dêi Khu xiâm hnê ngăn Chin phuh ƀă 27 kong pơlê, pơlê kong kân Peăng Hdroh

Drêng ai pơreăng xông tâ tú ó tiah mê, Pơlê kong kân Hồ Chí Minh hiăng hbrâ mơdât, tiô pôa Nguyễn Thành Phong, Kăn hnê ngăn pơlê kong kân tối, pơlê kong kân hiăng hbrâ rơnáu ăm tơdroăng ki troh a 20 rơpâu ngế ki tâ tú pơreăng.

“Drêng ai tơdroăng ki xâu xía ó xua ai krâm mơngế tâ tú hluâ tâ hneăng hdrối nah, pơkâ pêi pro tiô tơdroăng pơkâ 16, mê Pơlê kong kân hiăng tơkŭm ‘mâi rơnêu ƀă xúa 5 toăng hngêi ối ki ôh tá ai mơngế ối hên a bêng An Khánh, pơlê kong kân Thủ Đức, tâi tâng ai 24 rơpâu to xoăng ƀă tíu xiâm ki ai tŭm mâu tơmeăm khoăng, kơmăi chal nếo ƀă chiâng vâ veăng kum hiâm hyôh ô xy tơdrêng ăm 1 rơpâu ngế, troh nôkố, pơlê kong kân xuân chiâng vâ vêh mơnhên tối hiăng hbrâ ăm tơdroăng ki vâ mơdât drêng ai 20 rơpâu ngế tâ tú”.

Klêi kơ’nâi tơmâng mâu rơkong tơpui mơnhên, rơhí rơhó dêi mâu kong pơlê, pơlê kong kân ƀă khu râ xiâm, mơgêi hneăng hôp, pôa Phạm Minh Chính, Ngế pro xiâm hnê ngăn tơnêi têa hiăng kơdeăn mâu tơdroăng ki hiăng kơdo mơ-eăm, châ chiâng pêi pro ki Pơlê kong kân Hồ Chí Minh ƀă mâu kong pơlê hiăng chiâng pêi pro tung pơla mâu hâi hdrối mê hiá nah, hiăng mơ-eăm tâi ivá mơno tơná, xua vâ rak tơniăn ivá châ chăn kuăn pơlê, tơdroăng rêh kâ ối kuăn pơlê. Ngế pro xiâm hnê ngăn xuân hiăng pơkâ thế ai troăng hơlâ ó rơdêi luâ tâ nếo, khŏm mơ-eăm, pêi kơhnâ, pro tơdrăng, seá ngăn mơnhên tơdroăng, thâ rĕng, pêi tơƀrê vâ kâi châ mơdât pơreăng, ngăn tơdroăng kring vế, rak ngăn ivá kuăn pơlê cho kal má môi, ôh tá ăm kuăn pơlê ki lâi tro hêng klêa, ôh tá ai hmân ếo xâp, phái, hmê, kơchâi kâ xuân athế ai tŭm; tơkŭm khăm pơlât mơngế ki tro tâ, mơ-eăm mơdât tơdroăng ki mơngế châi tamo ó lơ hlâ; kring vế, gak ngăn tơdroăng rêh ối kuăn pơlê tơniăn, hnoăng pơkuâ ngăn kuăn pơlê châ rak krá kâk, hmâ drêng lâi, la lâi xuân athế tơniăn ăm kuăn pơlê; kring vế tơniăn troăng tơkăng kong, ôh tá ăm ai khu ngế ing kong têa ê châ mot lo, tơkâ luâ troăng tơkăng kong ƀă tơnêi têa pin; gak vế ngăn krá tơniăn a mâu hngêi kơmăi, tíu pêi cheăng, khŏm pêi lo mơjiâng kế tơmeăm ki vâ kâ, rêh ối, vâ xúa rêm hâi.

Pôa Phạm Minh Chính, Ngế pro xiâm hnê ngăn

‘Na tơdroăng ki pơkuâ ngăn, Ngế pro xiâm hnê ngăn tơnêi têa tối mơnhên, rơdêi kal athế tơrŭm krá kâk tâ nếo pơla mâu hdroâng mơngế tung hnoăng cheăng hbrâ, tơplâ, mơdât pơreăng:

“Môi tuăn môi hiâm tiô tơdroăng pơkâ “Tơplâ pơreăng môi tiah plâ xâ”, pêi pro kơhnâ khât tâ nếo, tơƀrê tâ nếo tung tơdroăng ki tơkôm ngăn tơdroăng nếo tơplâ mơdât, mê athế pêi pro ahdrối vâ mơdât pơreăng tâ tú. Hbrâ mơdât pơreăng cho ki kal má môi, pêi pro ton xŏn la ngiâ, pơkâ tơtro tơdroăng. Pơtối mơnhông tơdroăng tơrŭm ki ó rơdêi dêi hdroâng mơngế, tâi tâng khu kăn xiâm pơkuâ, pơlê pơla, khu mơdró, mâu ngế ki pôu râng hnoăng cheăng, rơtế dêi pó tơplâ mơdât pơreăng, pêi pro tiô troăng hơlâ, pơkâ cheăng ki khu râ hiăng pơcháu, hiăng pơkâ thế pêi pro, pơtối hnê hriâm dêi pó túa tơplâ mơdât pơreăng.

Pơtối mơnhông ó má môi tung tơdroăng ki pêi pro dêi xêh mâu tơdroăng cheăng, hlo hlê rơkê plĕng, hbrâ rơnáu tung tơdroăng cheăng pơkal athế mâu khu râ kơvâ cheăng xiâm tơnêi têa troh a mâu kong pơlê, pơlê kong kân. Tơdroăng rêh ối ki nếo kal athế ai troăng hơlâ ki nếo, kal hlê plĕng tơdroăng, séa mơnhên ngăn tơdroăng ki ai păng ‘nâng vâ mơ’no hnoăng cheăng pêi ki tơtro, pơtối mơdêk hnoăng cheăng ki rơkê plĕng, hbrâ rơnáu. Rêm cheăm, bêng, hngêi kơmăi, tíu pêi cheăng, kơ koan, đông lêng cho rêm tíu ki tơplâ mơdât pơreăng, rêm ngế kuăn pơlê cho mơngế lêng ki pêi pro tŭm hnoăng cheăng ki tơplâ mơdât pơreăng”.

Pakĭng mê, kal athế tơmâng ngăn khât tơdroăng ki kal kân khât dêi kuăn pơlê, mơdêk tơdroăng cheăng ki tŏng kum kuăn pơlê. Veăng tơplâ mơdât pơreăng cho hnoăng cheăng, tơdroăng ki athế pêi pro ƀă hnoăng cheăng ki ai pơxúa ăm kuăn pơlê. Khu xiâm pơkuâ hnê ngăn Đảng, mâu tíu pơkuâ hnê ngăn Đảng, khu kăn pơkuâ, mâu khu pêi cheăng ‘na kal kí rêm râ athế mơhno tối nhên cho tíu ki loi tơngah dêi kuăn pơlê; pro tơdroăng ki xahpá, pơloăng mơnúa mê chiâng ivá cheăng ki ó rơdêi, tŏng kum kuăn pơlê hên tâ. Krếo thế kuăn pơlê veăng tŏng kum, mơhno tối, djâ troăng ăm kuăn pơlê pêi pro kơtăng khât tiô pơkâ dêi Tơnêi têa ‘na hbrâ, mơdât pơreăng, hnối pêi chiâk pêi deăng, pêi cheăng kâ, tê mơdró. Pơtối mơnhông, mơdêk troăng hơlâ, ki tơƀrê, ƀai mơhriâm ki lĕm tro, tơniăn khât, rơkê kơnía khât tung hnoăng tơplâ pơreăng.

Mâu kong pơlê, pơlê kong kân ai hên tíu, hên kơpong ki pơreăng tâ tú kal athế rĕng hdró, rĕng mơdât mơngế mot lo ing kơpong ki mê; thâ rĕng tŏng kum kuăn pơlê tơniăn rêh kâ ối, pêi cheăng. Xo tơ-uân tung tơrêm roh vâ pêi cheăng kâ, tê mơdró kâ; mơjiâng mâu tíu xiâm ki lo tŏng kum, ai troăng phôn, tơdroăng cheăng ki kal vâ rĕng châ pơtâng tối tơdrêng; hriăn plĕng mơjiâng troăng Internet ki xúa kŏng ngê̆ thŏng tin vâ kuăn pơlê châ rĕng tối pơtâng tơdroăng ki xahpá, ối tơvâ tơvân, drêng lâi xuân ai, drêng lâi xuân chiâng vâ tơpui tơno, vâ pêi pro.

Tung pơla pơkâ mơ’no rak vế tiô pơkâ 15, 16 kal athế pêi pro lĕm tro tơdroăng tối pơtâng, mơhno tối, tơdjâ troăng ki tơniăn ăm kuăn pơlê, rak ngăn, păn roăng kuăn pơlê, mơdât ƀă kơdroh tơdroăng ki pro kuăn pơlê chiâng tăm nâ, chiâng hêng hôu. Mâu khu chêh hlá tơbeăng kal athế rĕng chêh tối mơ’no tơdrêng, rĕng pơtâng tối vâ kuăn pơlê châ tâng, châ hlê vâ veăng kơhnâ khât tung hnoăng cheăng hbrâ, tơplâ, mơdât pơreăng.

Ngế pro xiâm hnê ngăn hiăng pơkâ thế rêm râ, kơvâ cheăng, mâu kong pơlê, pơlê kong kân kơdo mơ-eăm hên tâ nếo, khŏm mơ-eăm hên tâ nếo vâ pêi pro klêi tơdroăng cheăng ki mê, thâ rĕng châ kâi mơdât pơreăng tâ tú, mơjiâng ăm kuăn pơlê ai tơdroăng rêh ối tơniăn, hơniâp ro, pêi pro ƀlê trâng 2 hnoăng cheăng: Tơplâ mơdât pơreăng ƀă pêi cheăng kâ-rêh ối.

                                                                                                                        VOV1

Nhat Lisa tơplôu ƀă tơbleăng