VOV4.Sêdang - Hâi lơ 24/6, a Tíu pêi cheăng Chin phuh, pôa Trương Hòa Bình, Ngế pro xiâm phŏ hnê ngăn Chin phuh, Kăn pơkuâ hnê mơhno Tơnêi têa Tơdroăng pơkâ xiâm tơnêi têa mơnhông mơdêk cheăng kâ – rêh ối pơlê pơla kơpong vâi krâ hdroâng kuăn ngo ƀă kơpong kong ngo hneăng hơnăm 2021 – 2030, pơkuâ roh hôp dêi Khu hnê mơhno. Mơgêi roh pêi cheăng, pôa Trương Hòa Bình tối rơdêi pơtối mơdêk tơdroăng ki ‘nâi mơ-eăm xêh, mơ-eăm khŏm xông tơtêk dêi kuăn pơlê mâu hdroâng kuăn ngo, mơjiâng mâu tơdroăng tơ’noăng ai kơdrâm ngế veăng.

Pôa Trương Hòa Bình, Ngế pro xiâm phŏ hnê ngăn Chin phuh

Mâu khu, kơvâ cheăng veăng pêi kơtăng vâ tơdroăng kố châ tơƀrê hôm khât, tơdroăng rêh ối dêi vâi krâ hdroâng kuăn ngo ƀă kong ngo rế hía rế châ mơdêk. Tiô pôa Trương Hòa Bình, tung pơla pơreăng COVID 19 pơtối tơdjâk kân troh rêm kơvâ cheăng dêi tơdroăng cheăng kâ – rêh ối pơlê pơla. Tơdroăng kố cho ai hnoăng kân, rế kum mơhnhôk tơdroăng mơjiâng pro ƀă kal vâ, mơjiâng cheăng pêi, mơnhông pêi kâ, tê mơdró, rế ai pơxúa kal khât ‘na tơdroăng tŏng kum rêh ối pơlê pơla, ki rơhêng vâ tối ƀă mâu ngế ki pá puât, rơpŏng kơtiê, tơdroăng pá puât a mâu kơpong hơngế hơngo.

A Sa Ly tơplôu ƀă tơbleăng