VOV4.Sêdang - Kơxê lơ 28/6, a Hngêi Kuô̆k hô̆i, pôa Vương Đình Huệ, Kăn xiâm hnê ngăn Kuô̆k hô̆i hiăng koh tơdah, hôp tơpui tơno ƀă pôa Thongloun Sisoulith, Kăn xiâm pơkuâ hnê ngăn Đảng, Kăn xiâm hnê ngăn kong têa Lếo. Pôa Thongloun Sisoulith ƀă pôa Vương Đình Huệ, Kăn xiâm hnê ngăn Kuô̆k hô̆i tơnêi têa pin pơrá tối tiah kố, hneăng lăm pôu dêi Kăn xiâm pơkuâ hnê ngăn Đảng, Kăn xiâm hnê ngăn kong têa Lếo mơnhên ăm hlo tơdroăng ki nếo dêi tơrŭm ki kân, môi tuăn dêi rơpó ƀă tơrŭm cheăng tung tŭm tơdroăng pơla Việt Nam - Lếo.

Tung pơla ai pơreăng COVID-19 tâ tú rơ-iô tung kơpong, Việt Nam khĕn kơdeăn khât mâu tơdroăng hbrâ mơdât pơreăng ki tơ-ƀrê dêi kong têa Lếo rĕng kâi mơdât pơreăng tâ tú, pơtối pê klêi tơdroăng pơkâ hneăng hôp kân rôh má 11 dêi Đảng Nhân yân Kăch măng Lếo. Pôa Thongloun Sisoulith tối nhên, tung la ngiâ, Kuô̆k hô̆i péa tơnêi têa kal pơtối mơdêk tơpui tơno, mơdêk tơrŭm cheăng, hnê tối ăm dêi rơpó tơdroăng cheăng, malối tung mơjiâng luât pơkâ ƀă séa ngăn nhên khât tơdroăng cheăng pêi dêi mâu kơ koan tơnêi têa; mơdêk tâ nếo tơrŭm pơla mâu Vi ƀan dêi péa Kuô̆k hô̆i tung séa ngăn pêi pro mâu tơdroăng tơhrâ tơrŭm cheăng péa tơnêi têa.

Kơxê lơ 28/6, a Tíu pêi cheăng Chin phuh, pôa Phạm Minh Chính, Ngế pro xiâm hnê ngăn tơnêi têa hiăng tơpui tơno ƀă pôa Thongloun Sisoulith, kăn xiâm pơkuâ hnê ngăn Đảng, kăn xiâm hnê ngăn tơnêi têa Kŏng hòa Yân chuh Nhân yân Lếo dế lăm pôu Việt Nam. Pôa Thongloun Sisoulith tối phiu ro châ lăm pôu Việt Nam tung hnoăng cheăng ki nếo, rơkâu mâu tơdroăng pêi pro ki kân, tâi tâng kuăn pơlê Việt Nam nhŏng o hiăng pêi klêi tung rôh mơnhông cheăng kâ rêh ối pơlê pơla hnối tơrŭm cheăng ƀă kong têa ê tung mâu hơnăm hdrối mê hía nah.

Péa ngế kăn xiâm pơkuâ tơpui tơno ‘na tơdroăng ƀă mơnhên tối khât mâu troăng hơlâ hbrâ mơdât pơreăng COVID-19 a rêm to kong têa tung pơla hdrối kố nah. Maluâ tơdjâk xua pơreăng COVID-19, péa pâ hiăng mơ-eăm rak vế pơtroh khu kăn lăm troh a tơnêi têa dêi pó ƀă pơtối trâm khu kăn xiâm, mơdêk châ tơƀrê mâu tơdroăng tơrŭm cheăng pơla péa tơnêi têa a rêm râ; tơrŭm tung mâu kơvâ gak kring, pơlê pơla cheăm bêng, cheăng kâ, tơdjêp troăng prôk, hnê hriâm ƀă hnê cheăng pêi, tơrŭm pơla mâu kong pơlê pơtối mơnhông; kơxô̆ liăn pêi lo tê mơdró pơla péa pâ tung 5 khế apoăng hơnăm 2021 châ 570,7 rơtuh dollars, tâk vâ chê 40% tâng vâ pơchông ƀă khế kố hơnăm 2020; nôkố Việt Nam ai 208 to tơdroăng tơkêa ‘no liăn cheăng a Lếo ối châ xêt khât ƀă tâi tâng kơxô̆ liăn chêh inâi 5,16 rơtal dollars Mih.

Katarina Nga tơplôu ƀă tơbleăng