VOV4.Sêdang - Kơxo lơ 4/7, pôa Phạm Minh Chính, Ngế pro xiâm hnê ngăn tơnêi têa hôp mơ’no tơdrêng tung um ƀă mâu kăn xiâm, kơvâ cheăng, mâu kăn pơlê kong kân Hồ Chí Minh, kong pơlê  Bình Dương, Đồng Nai, Bình Phước, Tây Ninh, Bà Rịa – Vũng Tàu, Long An, Tiền Giang ‘na hbrâ mơdât COVID-19. Tơpui mơgêi a hneăng hôp, pôa Phạm Minh Chính hnê mơhno: thăm rế pá mê thế ‘nâi tơrŭm môi tuăn dêi rơpó, tơmâng mâu kơpêng hnê tối, veăng kum, tơmâng xo, pê klêi mâu tơdroăng pơkâ, ai mâu troăng hơlâ pêi ki tơtro ƀă ki khât dêi a  kong pơlê, tíu pêi cheăng.

Pôa Phạm Minh Chính, Ngế pro xiâm hnê ngăn tơnêi têa tối tơbleăng mơgêi hneăng hôp

Thế ‘nâi nhên tơná, pơlê kong kân Hồ Chí Minh, Hà Nội thế kum má môi ‘na tơdroăng kal kí, cheăng kâ rêh ối pơlê pơla kring tơniăn tơdroăng cheăng lêng ƀă cho 2 kơpong cheăng kâ ki xiâm dêi lap tơnêi têa. Ngế pro xiâm hnê ngăn  tối nhên, tung la ngiâ, pơreăng kô tâ tú rơ-iô tâ, kal thế pơtối mơ-eăm pêi tiô “tơpéa tơdroăng’’, la kum pêi ahdrối cho hbrâ mơdât pơreăng plâ “rĕng châ ‘nâi, hdró kơpong, klâ krê rĕng, mơdât pơreăng tơ-ƀrê, rĕng tơniăn tơdroăng.

Gương tơplôu ƀă tơbleăng