VOV4.Sêdang - Hâi lơ 19/7, klêi kơ’nâi pêi cheăng ƀă Pơlê kong kân Hà Nội, pôa Phạm Minh Chính, Ngế pro xiâm hnê ngăn tơnêi têa hiăng pơkuâ po rôh hôp tơdrêng dêi Chin phuh ƀă Khu hnê mơhno cheăng Tơnêi têa ‘na hbrâ mơdât pơreăng COVID-19 vâ hmâng tối tơbleăng tơdroăng pơreăng, tung tơdroăng séa ngăn mê, pơkâ mâu troăng hơlâ pêi pro rơdêi tâ, pơkâ tơleăng kơhnâ tâ hlo mâu tơdroăng ki ôh tá tơniăn dêi pơreăng môi tiah nôkố.

Ngế pro xiâm hnê ngăn tơnêi têa hôp tơdrêng ƀă Khu hnê mơhno cheăng Tơnêi têa hbrâ mơdât COVID-19

Pơxiâm po rôh hôp, pôa Phạm Minh Chính pơkâ thế mâu rơkong ki veăng tơpui tối a rôh tơpui tơno kal tối tơdrăng tung mâu tơdroăng ki pêi pro ki nhên tơdjâk troh hnoăng cheăng hbrâ mơdât pơreăng nôkố, mê cho: hnoăng cheăng pơkuâ hnê mơhno, tơdroăng ki pêi pro kơtăng, pơxâu tung khu tơrŭm pêi pro; mơnhên tối ivá pêi cheăng, mâu ƀok thái pơkeăng, điều dưỡng, mâu ngế cheăng ‘na kih thuât, kế tơmeăm xúa tung khăm pơlât, tơdroăng ki tŏng kum kế tơmeăm, rak tơniăn kế kâ, kế tơmeăm xúa ki kal ăm kuăn pơlê; tơdroăng ‘na troăng prôk, chơ tơmeăm a troăng prôk; pêi pro tơdroăng rêh ối pơlê pơla, malối cho ƀă mâu ngế ki ôh tá ai cheăng pêi, mâu ngế ki trâm pá.

Tơdroăng pơkâ 68 kal ‘mot tơ’nôm mâu ngế ki lâi? Mâu tơdroăng ki tơvâ tơvân ‘na  liăn ngân kal pơkâ tơleăng môi tiah lâi? Ing mê vâ môi tuăn ƀă pơkâ mơ’no mâu troăng hơlâ pêi pro ki tơtro tâ, khât tâ tung tơdroăng kal pêi pro tơdrêng môi tiah nôkố.

Katarina Nga tơplôu ƀă tơbleăng