VOV4.Sêdang - Drêng pơreăng COVID 19 xông tâ tú ó a Pơlê kong kân Hồ Chí Minh ƀă mâu kong pơlê peăng Hdroh tơnêi têa, kơxo lơ 15/7, pôa Phạm Minh Chính, Ngế pro xiâm hnê ngăn tơnêi têa hiăng pơkuâ Hneăng hôp mơ’no tung um tiô troăng Internet pơla khu râ kăn xiâm ai mâ đi đo dêi Chin phuh ƀă 27 kong pơlê peăng Hdroh tơnêi têa ‘na tơdroăng hbrâ mơdât COVID 19.

A hneăng hôp, Ngế pro xiâm hnê ngăn Chin phuh pơkâ thế mâu kăn teăng mâ tơkŭm tơpui tơno mơnhên tơdroăng pơreăng COVID 19 nôkố ƀă tối hdrối tơdroăng tung la ngiâ; tơdroăng châ tơƀrê, kơdroh tung tơdroăng pêi pro hnoăng cheăng, troăng pêi tung pơla kố nah ƀă xiâm kối dêi mâu tơdroăng châ tơƀrê, ki tá hâi châ tơƀrê; mơhno mâu tuá pêi ki rơkê tơtro ƀă mâu pơkâ, pâ thế, mâu hnoăng cheăng, tuá pêi kal pêi pro tung la ngiâ.

Ki má lối cho ‘na tơdroăng hnê mơhno, tơkŭm pêi pro, tơdroăng tơrŭm pơla mâu kơvâ cheăng, kong pơlê vâ tơdroăng hbrâ mơdât COVID 19 châ tơƀrê tâ, tiô tơdroăng rak vế ivá kuăn pơlê cho apoăng.

A Sa Ly tơplôu ƀă tơbleăng