VOV4.Sêdang - A Hà Nội, Khu kăn Đảng lêng xiâm, Khu xiâm pơkuâ ngăn lêng hiăng tơkŭm po hneăng hôp tâi tâng mâu lêng 6 khế apoăng hơnăm 2021. Pôa Phạm Minh Chính, Ngế cheăng tung khu xiâm kal kí, Ngế pro xiâm hnê ngăn Chin phuh veăng hôp hnê mơhno a hneăng hôp; Thươ̆ng tưŏng Phan Văn Giang - Ngế cheăng tung khu xiâm kal kí, Kăn phŏ pơkuâ ngăn Đảng lêng xiâm, Kăn xiâm pơkuâ ngăn lêng pơkuâ hneăng hôp.

Tơbleăng a rôh hôp, pôa Phạm Minh Chính khĕn kơdeăn mâu kăn veăng hôp hiăng tơpui tối mâu tơdroăng môi tuăn, ai hnoăng veăng tơpui tối dêi rêm ngế cho tơdroăng ki kơnía khât, tơ’nôm, vâ chêh klêi tối tơ’nôm ‘na troăng hơlâ cheăng pêi. Hneăng hôp hiăng tơbleăng tối mâu tơdroăng cheăng pêi 6 khế mơ’nui hơnăm 2021.  Ing mê, tâi tâng mâu lêng pơtối tơbleăng trâu rơdâ tơdroăng Pơkâ hneăng hôp kân 13 dêi Đảng, Pơkâ Hneăng hôp Đảng ƀô̆ Lêng rôh má 11 ƀă mâu tơdroăng cheăng pêi ki kal pơla hơnăm 2021 - 2026. 

Khu Đảng lêng xiâm, Khu  xiâm pơkuâ ngăn lêng hiăng mơnhên tối mâu troăng hơlâ vâ pêi ki xiâm tung la ngiâ, tung mê ai tơdroăng hbrâ rơnáu, thế rơkê ƀĕng ƀeăn, rĕng tối tơbleăng hdrối, tối tro mâu tơdroăng, teăm tí tăng ‘nâi plĕng tơdroăng vâ pêi dêi Đảng , Tơnêi têa tơleăng mơnhên pêi klêi mâu tơdroăng ki trâm; pơtối tơbleăng trâu rơdâ mâu pơkâ, troăng hơlâ, tối mơgêi, tơdroăng tơkêa pro, luât pơkâ ‘na lêng, ‘na tơdroăng cheăng lêng.

Gương tơplôu ƀă tơbleăng