VOV4.Xơ Đăng - Kơxo lơ 10/1, a tiú pêi cheăng dêi Chin phuh, pôa Phạm Minh Chính, Ngế pro xiâm hnê ngăn Chin phuh ƀă pôa Phankham Viphavanh, Ngế pro xiâm hnê ngăn chin phuh kong têa Lếo hiăng vâ pơkuâ hneăng hôp rôh má 44 Vi ƀan Tơrŭm cheăng tung Chin phuh ‘na tơrŭm cheăng pơla péa pâ Việt Nam ƀă Lếo. Péa pâ hiăng tơpui vâ môi tuăn, pơ’lêh pêi mâu tơdroăng tơpui mơgêi dêi péa ngế xiâm cheăng kal kí ƀă tơhrâ pơkâ tơrŭm cheăng pơla péa tơnêi têa hơnăm 2022, malối tơkŭm tơbleăng pơkâ pêi kơtăng ing apoăng hơnăm vâ mơdêk tơrŭm cheăng tung tâi tâng mâu tơdroăng kal kí - tơpui kâ - kring tơniăn chêng lêng, ‘no liăn cheăng- tê mơdró.

Rôh hôp má 44 dêi Vi ƀan tơrŭm cheăng Chin phuh Việt Nam - Lếo

Mâu tơdroăng kal ƀă troăng rơhlâ tơpui kâ a rôh hôp drêng kố ai pơxúa kal khât tung pơ’lêh mâu tơdroăng tơhrâ tơrŭm cheăng to mâu kăn, kum mâu Khu xiâm, kơvâ cheăng, kong pơlê, khu mơdró péa tơnêi têa tơ’lêi hlâu tâ nếo tung mơnhông tơbleăng mâu tơdroăng tơrŭm cheăng, vâ pê klêi tơdroăng pơkâ tơrŭm cheăng hơnăm 2022.

Klêi hôp, péa ngế xiâm hnê ngăn tơnêi têa hiăng hlo leh kĭ tơhrâ, pơcháu 9 hlá mơ-eá tơrŭm cheăng pơla Chin phuh ƀă mâu khu xiâm, kơvâ cheăng, kơ koan, khu mơdró péa tơnêi têa.

Gương tơplôu ƀă tơbleăng