VOV4.Xơ Đăng - Kơxo lơ 8/1, klêi kơ’nâi Leh tơdah ƀă tơpui tơno, pôa Phạm Minh Chính, Ngế pro xiâm hnê ngăn Chin phuh ƀă pôa Phankham Viphavanh, Ngế pro xiâm hnê ngăn kong têa Lếo hiăng pơkuâ hôp khu chêh hlá tơbeăng ‘na tơdroăng tơpui tơno ƀă mơhnhôk Hơnăm rŭm môi tuăn pơla Việt Nam – Lếo, Lếo – Việt Nam 2022. Xông tơpui a roh hôp khu chêh hlá tơbeăng tơdjuôm, péa Ngế pro xiâm hnê ngăn tơnêi têa hiăng tối mâu tơdroăng châ tơƀrê ki kal a roh hôp tơpui tơno, péa kăn xiâm pơkuâ tối ăm ‘nâi tơrŭm kân kĭn, tuăn pâ ki má môi ƀă tơrŭm tŭm têk pơla péa Đảng, péa Tơnêi têa ƀă kuăn pơlê péa tơnêi têa tung pơla kố nah đi đo krá tơniăn ƀă xông tơtêk.

Leh mơhnhôk “Hơnăm tơrŭm môi tuăn pơla Việt Nam – Lếo’’

Ngế pro xiâm hnê ngăn Chin phuh péa tơnêi têa kô pơtối hnê mơhno mâu khu xiâm, kơvâ cheăng, kong pơlê rêm pâ thâ séa ngăn, tah lôi mâu tơdroăng pá puât, pơkâ troăng pơkâ pêi, troăng hơlâ kơjo ăm dêi pó, pro tơ’lêi hlâu thăm tơrŭm cheăng tê mơdró ƀă mơ’no liăn cheăng, tơniăn tơdroăng pêi teăm tơdrêng, dâi lĕm dêi mâu tơdroăng tơkêa bro tơrŭm cheăng pơla péa tơnêi têa.

A Sa Ly tơplôu ƀă tơbleăng