VOV4.Sêdang - Pôa Trương Hòa Bình, Ngế pro xiâm phŏ hnê ngăn Chin phuh má môi hiăng lăm séa ngăn hnối pêi cheăng ƀă khu kăn pơkuâ mâu pơlê krâm Gò Vấp ƀă Bình Thạnh dêi Pơlê kong kân Hồ Chí Minh ‘na hnoăng cheăng hbrâ mơdât pơreăng a kong pơlê. A rôh pêi cheăng ƀă to pơlê krâm Gò Vấp ƀă Bình Thạnh, Ngế pro xiâm phŏ hnê ngăn tơnêi têa pơkâ thế mâu pơlê krâm kal ai túa pơkâ hbrâ rơnáu tŭm kế tơmeăm xúa tung khăm pơlât vâ rak tơniăn 4 tơdrêng drêng ai pơreăng ôh tá tơniăn.

Mơdêk rak ngăn pơlê kong kân, pơtối mơdêk tối tơbleăng troh kuăn pơlê, malối cho ƀă mâu tíu ki pêi cheăng, mâu kơpong hngêi ki ăm mung ối dêi mâu kŏng nhân, mâu ngế ki tê mơdró kŭn pêi pro tro tơdroăng pơkâ 5K. Ngế pro xiâm phŏ hnê ngăn tơnêi têa hnê pơchân mâu pơlê krâm kal pêi pro tro hnoăng cheăng tơrŭm tung tơbleăng pêi pro, malối cho drêng ai khu ki châ pơtroh vâ tŏng kum hbrâ mơdât pơreăng. Tiô pôa, maluâ khu ki veăng hbrâ mơdât pơreăng sap ing tíu ê troh lơ khu ki tŏng kum a pơlê krâm pơrá kal hbrâ rơnáu rak ngăn tơniăn, vâ pôi tá ăm tro tơdjâk, pro pá ăm kuăn pơlê.

Katarina Nga tơplôu ƀă tơbleăng